Një aksident me vdekje ndodhi një ditë më parë në aksin rrugor Fier-Vlorë, ku humbi jetën një i moshuar.
Ditën e djeshme u raportua se mjeti tip ‘Ford’ që përplasi të moshuarin për vdekje drejtohej nga një grua 44-vjeçare, por sot policia deklaron se në timon ka qënë bashkëshorti i 44-vjeçares.
Ky i fundit mësohet se është vënë në pranga këtë të martë nga Policia.
“Specialistët e Qarkullimit Rrugor të DVP Vlorë, në vijim të veprimeve hetimore për zbardhjen e rrethanave të aksidentit me pasojë vdekjen, të ndodhur ditën e djeshme në aksin rrugor “Fier-Vlorë”, arrestuan në flagrancë shtetasin M. Gj., 53 vjeç, banues në Vlorë.
Nga këqyrja e pamjeve filmike ka rezultuar se në kohën që është aksidentuar me pasojë vdekjen shtetasi Rr. V., 73 vjeç, automjeti tip “Ford” drejtohej nga shtetasi M. Gj. dhe jo nga bashkëshortja e tij, siç ata deklaruan fillimisht”, njofton policia.
Materialet në ngarkim të 53-vjeçarit i kaluan prokurorisë për veprime të mëtejshme.
