Është shfaqur sërish brenda një harku kohor të shkurtër në media vëllai i Klement Balilit, Bashkim Balili, i cili është intervistuar nga Ora News. Bashkimi i cili njihet edhe si posedues me letra i një pasurie të madhe të kësaj familje për të cilën është vendosur sekuestro, përveç të tjerave ka folur edhe telefonatën e fundit me të vëllain e shumëkërkuar jo vetëm nga drejtësia shqiptare. Sipas tij biseda e fundit me Klementin ka qenë tre muaj më parë.
“Tre muaj më parë kam komunikuar në telefon, madje më ka marrë në telefon. Nuk e di se ku se ku ndodhet. E kam pyetur dhe i kam thënë që duhet të vijë, dhe pse vjen të dorëzohet shprehimisht më ka thënë: Ata që e nisën para 10 viteve këtë skenar janë të njëjtët persona që ndërtuan të njëjtin skenar. Nuk ka besim tek drejtësia sepse është në ndikimin e politikës, kur drejtësia do të ecë në binar të drejtë unë do të paraqitem. Dhe kështu siç është drejtësia, nëse do të më çojnë në bankën e të akuzuarve dhe të më dënojnë do njoh vendimin”, ka rrëfyer Bashkim Balili.
Sipas kësaj dëshmie i ashtuquajturi “Eskobar i Ballkanit” pretendon për një skenar të thurur kundër tij, i cili ka nisur 10 vite më parë duke aluduar kështu edhe për përfshirje të politikës.
