Kryebashkiaku i Tiranës Erjon Veliaj është shprehur se këshilltarët e LSI-së që votuan pro pr/buxhetit të bashkisë për vitin 2018 i janë vetëofruar.
PD dhe LSI bojkotuan mbledhjen e Këshillit Bashkiak, por 4 këshilltarë të Lëvizjes Socialiste për Integrim bashkuan votat me grupin e këshilltarëve socialistë.
Për Veliaj, këshilltarët e LSI nuk iu nënshtruar lojërave dhe sterkëmbshave politike.
“Në pjesën më të madhe më kanë ardhur dhe më kanë thënë se nuk mund të hyjnë në histori si dikush që ndaloi progresin e qytetit. Më shumë se i kam bindur më janë vetëafruar. Kur të shkruhet historia dhe mos jenë këto problemet PD, PS, LSI pas 100 vjetësh, të mos jemi në faqen e historisë që këta bllokuan qytetin”, tha Veliaj në një intervistë televizive.
Këshilli Bashkiak i Tiranës miratoi buxhetin me 32 vota, ndërsa opozita e konsideroi te paligjshëm këtë votim. Gjithashtu opozita ka akuzuar Veliajn për rritjen e taksave me të paktën 75 mijë lekë për familje.
