Kontrolli i Lartë i Shtetit ka publikuar pak kohë më parë raportin e monitorimit për strategjinë e menaxhimit të riskut. Ajo që bie në sy është rritja e rriskut politik, që sipas KLSH, rezulton në një indiferencë të institucioneve për të zbatuar rekomandimet e bëra nga ky institucion, pas auditimeve dhe gjetjeve.
“Elementi i riskut të dimensionit politik, në matricën e regjistrit të rriskut është zmadhuar. Mosndërgjegjësimin dhe inertësinë e administratës shtetërore është rivlerësuar në rritje nga 60 (i mesëm) në 70 (i mesëm). Ky rrisk ka influencë negative në zbatimin e rekomandimeve të KLSH-së, me efekt negativ në përmirësimin e veprimtarisë së subjekteve të audituara.
Ky rrisk vlerësohet i mesëm për shkak të rritjes së transparencës, publikimit të rezultateve të auditimit, trajtimi i letrave të popullit, botimet dhe rritja e prezencës së KLSH në media konsiderohen si objektiva të duhur për mitigimin e këtij rrisku”, thuhet në raportin e KLSH.
Nga ana tjetër, rrisqe të tilla si ai i dimensionit teknologjik apo social kanë pësuar përmirësim duke u ulur nga niveli i lartë ne të mesëm.
Strategjia e menaxhimit të rriskut është dokumenti që i shërben KLSH-së si një vlerësim mbi atë qe audiuesit hasin gjatë kontrolleve dhe adresimin e problematikave në mënyrë që mos cënohen standardet mbi te cilat punohet.
Monitorimi i rriskut sipas strategjisë nisi që nga viti 2015 dhe rishikohet do vit sipas përditësimeve që i bëhen edhe strategjive.
