Partizani është shpallur kampion i Shqipërisë për sezonin 2022/2023. Të kuqtë fituan pasditen e sotme titullin e 17-të në historinë e tyre.
“Demat e kuq” të Partizanit kanë arritur të triumfojnë me rezultatin, 2-0, në ndeshjen e javës së fundit të kampionatit ndaj Teutës, rezultat që në fund u dha dhe titullin.
Goli i parë i sfidës erdhi në minutën e 39’-të të sfidës nga Arilindo Rrapaj, me këtë të fundit që pasi driblon bukur mbrojtjen “durrsake”, driblon dhe portierin Qirko, duke i dhënë kështu avantazhin e shumë kërkuar shokëve të tij të skuadrës.
Dyfishimi i shifrave erdhi nga Tedi Cara në minutën e 96′-të të sfidës, duke i dhuruar kështu fitoren e madhe shokëve të tij të skuadrës.
Në krahun tjetër, rivalët historikë, por dhe direkt në garën e këtij viti për titullin kampion, bardheblutë e Tiranës fituan ndaj “shijakasve” të Erzenit, me sfidën e luajtur në “Niko Dovana”, që mbaroi me rezultatin 2 me 1, pas golave të Haxhiut e Abazajt për “bardheblutë” e Iljazit për “shijakasit”, respektivisht në minutat 36’, 95′ e 40’ të sfidës.
Skuadra e drejtuar nga Colella pas 36 javësh kampionat ka grumbulluar 67 pikë, po aq sa Tirana, por titullin e vendosën ndeshjet direkte (në favor të Partizanit).
Veç titullit kampion, janë zbuluar edhe enigmat e tjera të kampionatit elitar shqiptar. 3 vendet e para si Partizani, Tirana dhe Egnatia kishin siguruar pjesëmarrjen në Europë. Vendi i katërt që do t’i bashkohet këtyre skuadrave në rrugën Europiane është Vllaznia.
Sipas rregullave, të kuqtë e shohin veten në para-kualifikueset e Champions League, ndërsa në Conference League do luajnë bardheblutë, rrogozhinasit dhe shkodranët.
Nga Kategoria bien Kastrioti dhe Bylis, ndërsa në Play Out është Erzeni, skuadër kjo që për të qëndruar mes më të mirëve duhet të mundë Korabin.
Përfundon sezoni i makthit për Kukësin. verilindorët shmangin kështu më të keqen duke u renditur në vendin e shtatë.
Është mbyllur kështu një sezon kontrovers i futbollit shqiptar, teksa penalltia e dyshimtë kundër Tiranës nga arbitri Kridens Meta, do të mbahet mend gjatë nga tifozët bardheblu, vendim i cili në fund rezultoi përcaktues në fatet e titullit kampion.
Klasifikimi final:
