Reshjet e shiut sollën përmbytje këtë pasdite në rrugët e Kuçovës dhe degradimin e asaj që cilësohet si çakull elektoral.
Lidhur me situatën ka reaguar edhe kandidati i opozitës për Bashkinë Kuçovë në lokalet e 14 Majit, Lefter Maliqi. Në një postim në rrjetet sociale, teksa sjell pamje nga një rrugicë e shtruar rishtas me cakull para zgjedhjeve në qytet, Maliqi shkruan me ironi: Iku dhe ‘çakulli elektoral’! E mori lumi!
Një apel bën për oligarkun Pëllumb Salillari të cilin e ka akuzuar për blerje masive votash në favor të kandidatit të mazhorancës dhe kryebashkiakut aktual Kreshnik Hajdari:
‘Oligarku’ Pëllumb Hajdari dhe ‘pengu’ i tij Kreshnik Salillari, duhet të shikoni tani si e katandisët qytetin e Kuçovës me ‘çakullin elektoral’!
Kuçova, shton ai, nuk meriton hajdutë të taksave tuaja dhe as të paaftë!
“Bashkinë e grabitur nga pengmarrësi, pengu dhe bandat në pushtet do ja kthejmë qytetarëve! Kuçova e naftetarëve, aviatorëve dhe intelektualëve, meriton zhvillim dhe ndryshim rrënjësor! T’ju kishin votuar ju jepja dorën por nuk e kanë bërë, i keni vjedhur dhe për këtë do ju jap çfarë ju takon! Ne do ja dalim të kthejmë besimin”, përfundon Maliqi.
Koalicioni Bashkë Fitojmë ka bërë ankim në KAS kundër rezultatit të zgjedhjeve në Kuçovë. Nga ana tjetër, Maliqi ka depozituar kallëzim në SPAK, ndërsa është shprehur publikisht se mazhoranca me ndihmën e oligarkut Salillari manipuluan zgjedhjet për Bashkinë Kuçovë.
