Një sherr që ka degraduar në përdorimin e armëve të ftohta ka shënuar një viktimë dhe një të plagosur, mesditën e kësaj të Marte në Gramsh.
Ngjarja ka ndodhur para shkollës 9-vjeçare “Asllan Shahini”, ku 4 të rinj janë konfliktuar me njëri-tjetrin e për pasojë ka humbur jetën Fatjon Bici, ndërsa i plagosuri është 15-vjeçari, Marko Liçi.
Sipas mjekëve, i plagosuri është jashtë rrezikut për jetën, por do te niset drejt spitalit të Traumës në Tiranë.
Ndërkohë 3 të rinjtë e tjerë janë shoqëruar nga policia, dhe priten të merren në pyetje për sqarimin e plotë të rastit.
Njoftimi i policisë:
Rreth orës 13:30, në lagjen “Sport 2”, Gramsh, në rrugë, pas një konflikti të çastit mes 5 adoleshentëve është plagosur rëndë me mjet prerës (thikë), njëri prej tyre, shtetasi F. B., 15 vjeç, i cili pasi është dërguar në spital, ka humbur jetën për shkak të dëmtimeve.
Shërbimet e Policisë, me marrjen e njoftimit, kanë shkuar menjëherë në vendin e ngjarjes. Pas ndjekjes nga Policia, janë kapur dhe janë shoqëruar në Komisariat, 4 adoleshentët (ndërmjet tyre dhe autori) e përfshirë në konflikt, konkretisht shtetasit E. K., 15 vjeç, A. C., 14 vjeç, O. C., 14 vjeç dhe S. M., 15 vjeç të cilët do të merren në pyetje nga specialistët për Hetimin e Krimeve, në prani të prokurorit, të psikologut dhe të prindërve të tyre.
Grupi hetimor vijon veprimet për zbardhjen e rrethanave të kësaj ngjarjeje dhe përcaktimin e autorësisë së ngjarjes. Në përfundim të veprimeve, do të ketë njoftim për arrestimin e autorit dhe për masat që do të merren për 3 shtetasit e tjerë të shoqëruar
