Rafael Leao është padyshim futbollisti për të cilin stafi dhe tifozët e Milanit po luten çdo moment që të jetë i gatshëm për ndeshjen ndaj Interit në Champions. Portugezi do të ishte një humbje e madhe për kuqezinjtë në prag të këtij takimi kaq të rëndësishëm.
Pavarësisht se ditët e fundit u bë thuajse e sigurt që Leao do të mungojë ndaj Interit, sot duket se situata ka ndryshuar paksa. Portugezi ka kryer teste fizike në mëngjes dhe ndryshe nga dje kur po bënte vetëm vrapime të lehta, sot stërvitja e tij ka pasur edhe sprinte, kthesa e lëvizje të tjera për kushtet e ndeshjes.
Pas stërvitjes individuale, Leao nuk është larguar nga kompleksi por është bashkuar me pjesën tjetër të skuadrës duke dhënë një sinjal se ende nuk është vendosur nëse do të jetë pjesë për ndeshjen apo jo. Te Milani shpresojnë që të jetë të paktën në stol, por gjithashtu ekziston frika që sulmuesi të pësojë ndonjë dëmtim edhe më të rëndë që mund t’i rrezikonte sezonin.
Skuadra dhe trajneri do të kenë mbledhjen e fundit para ndeshjes në orën 17:00 për të diskutuar detajet e fundit në prag të takimit. Pikërisht në këtë mbledhje, do të vendoset edhe për Leaon nëse do të luajë titullar, do të jetë në stol apo do të përfundojë në tribunë.
