Një 28 vjeçar është vënë në prangat e policisë së Kurbinit pasi akuzohet për kultivim, të bimëve narkotike.
Në kuadër të operacionit të koduar “Imazhi 2” me anë të dronit është bërë i mundur evidentimi dhe goditja e një rasti tjetër i kultivimit të bimëve narkotike.
Uniformat blu bëjnë me dije se në pranga ka rënë Arnold Bibaj dhe se është proceduar penalisht kryetari i fshatit Gallatë, Gjon Bibaj për veprën penale “shpërdorim detyre”.
Sipas policisë mësohet se nga operacioni janë sekuestruar me anë të djegies, 285 bimë të dyshuara narkotike cannabis sativa, të kultivuara në zonë pyjore, në fshatin Gallatë.
“Asgjësohen me anë të djegies, 285 bimë të dyshuara narkotike cannabis sativa, të kultivuara në zonë pyjore, në fshatin Gallatë.
Gjatë këtij operacioni, përmes përdorimit të dronit, në një zonë pyjore të fshatit Gallatë, njësia administrative Milot, u konstatuan të kultivuara 285 bimë të dyshuara narkotike cannabis sativa, të cilat pas veprimeve procedurale dhe hetimore, u asgjësuan me anë të djegies.
Në vijim të veprimeve procedurale, u bë arrestimi në flagrancë i shtetasit A. B., 28 vjeç, i dyshuar si kultivuesi i bimëve narkotike.
Gjithashtu, nisi procedimi në gjendje të lirë, për shpërdorim detyre, për shtetasin Gj. B., 51 vjeç, me detyrë kryetar i fshatit Gallatë”, njofton policia.
Materialet procedurale i kaluan Prokurorisë, për veprime të mëtejshme.
