Kandidati i koalicionit “Bashkë Fitojmë” për bashkinë e Kuçovës, Lefter Maliqi ka denoncuar sërish raste të tjera të tentativave të socialistëve për të blerë vota në këtë zonë.
Gjatë një reagimi në rrjetet sociale, Maliqi theksoi se në Kuçovë fiken dritat dhe gjatë natës blenë vota ata të cilët i etiketoi si “hajdutët e Kreshnik Salillarit, ‘pengut’ të oligarkut Pellumb Hajdarit!”.
Maliqi gjithashtu këshillon qytetarët që t’i marrin lekët e oligarkëve dhe më pas ta ndëshkojnë me votë kundër Partinë Socialiste për të sjellë ndryshimin në Bashkinë e Kuçovës.
“Skandal po fikin dritat natën në Kuçovë dhe blejnë votat si ‘kaçakë’, hajdutët e Kreshnik Salillarit, ‘pengut’ të oligarkut Pellumb Hajdarit! Thirrje qytetarëve dhe opozitës së Bashkuar Kuçovë:
– “Këto ditë qëndroni vigjilentë, patrulloni dhe kapni hajdutet që mbrohen nga Policia!” Lekët ja u merrni se janë lekët tuaja dhe i ndëshkoni me votë!
⛔️ Stop shitblerjes së votës!
⛔️ Stop presioneve!
⛔️ Stop çakulli elektoral! Votoni me zemër!
Kuçova “Kantier Ndërtimi”! Fitorja është e sigurt!”, shkruan Maliqi.
Gjithashtu denoncimi i Lefter Maliqit është shpërndarë në rrjetet sociale edhe nga ish-presidenti dhe njëkohësisht kreu i Partisë së Lirisë, Ilir Meta.
Meta fton qytetarët që të votojnë masivisht Maliqin pasi ai do t’i kthejë qytetarëve bashkinë e Kuçovës.
“Asgjë nuk e ndal fitoren e Lefter Maliqit që ka fituar zemrat e të gjithë banorëve të Kuçovës. Lefter Maliqi do i’a kthejë bashkinë qytetarëve. Asgjë nuk e shpëton Hajdarin e oligarkut nga ndëshkimi mbarëpopullor në 14 Maj!”, shkruan Meta.
