Një ngjarje e rëndë është regjistruar këtë të hënë në Skrapar, ku një çift holandez që ishin futur për të notuar në kanionet e Osumit janë përballur me të papriturën.
Sipas një njoftimi të policisë së Çorovodës, rezulton se një 64-vjeçare është paraqitur për ndihmë mjekësore në spital pasi ka mundur të dalë nga kanioni, ndërsa ka njoftuar zhdukjen e bashkëshortit të saj.
Turistja holandeze ka njoftuar autoritetet se bashkëshorti 68-vjeçar është rrëmbyer nga rrjedha e ujit.
Menjëherë kanë nisur kërkimet për të gjetur të moshuarin që është rrëmbyer nga rryma, teksa në ndihmë të policisë së Beratit kanë mbërritur edhe forcat RENEA.
Njoftimi i policisë:
Më datë 08.05.2023, në spitalin e Çorovodës, është paraqitur për ndihmë mjekësore shtetasja holandeze H. (V. A.) C. S., 64 vjeçe, e cila paraprakisht ka deklaruar se së bashku me bashkëshortin e saj, shtetasin J. A. S., 68 vjeç, ishin futur për të notuar në kanionet e lumit Osum.
64-vjeçarja ka mundur të dalë nga lumi, ndërsa bashkëshortin e saj e ka marrë rrjedha e ujit.
Shërbimet e Komisariatit të Policisë Skrapar, ato të DVP Berat, si dhe shërbimet zjarrfikëse kanë shkuar menjëherë në kanion dhe po vijojnë kërkimet në lumin Osum.
Në ndihmë të shërbimeve të Policisë Vendore, janë nisur polumbarët e Repartit Special “RENEA”, me qëllim gjetjen e shtetasit J. A. S.
Grupi hetimor vijon punën për sqarimin e rrethanave të rrethanave të kësaj ngjarjeje.
