Në kanionet e Osumit në Skrapar kanë vijuar edhe sot kërkimet nga policia dhe polumbarët për gjetjen e turistit 68-vjeçar nga Holanda, i cili u rrëmbye nga rrjedha e ujit pasditen e djeshme.
Jules Schurmmans dhe bashkëshortja e tij, Helma Schurmman (64 vjeçe) ishin futur një ditë më parë në kanionet e Osumit për të notuar.
Por duket se prurjet e ujit u shtuan dhe morën përpara 68-vjeçarin, ndërsa arriti të shpëtojë gruaja, e cila doli nga lumi dhe u trajtua me ndihmë mjekësore më pas në spitalin e Çorovodës.
Ajo ka lënë sot ambientet e spitalit dhe i është bashkuar kërkimeve për gjetjen e bashkëshortit të saj.
Sakaq, nga vendngjarja Presidenti i Federatës shqiptare të Rafting, Zamo Spathara, tregoi për mediat sesi e kanë gjetur turisten holandeze një ditë më parë, në kanionet e lumit Osum.
Spathara u shpreh se e gjetën rastësisht 64-vjeçaren buzë lumit dhe ishte pothuajse e rraskapitur. Ato i kanë dhënë ndihmën e parë turistes dhe më pas janë nisur për të kërkuar në pikat ku ato mendonin se mund të kishte përfunduar partneri i saj Jules Schurmmans, trupi i të cilit ende nuk është gjetur.
Sipas Spatharës, ka shumë rrezik që trupi i tij do të jetë zhytur në ujë dhe se është e vështirë të gjendet.
“Ne e dimë rrezikun se ku është dhe falë rregullore sonë të fortë ne kemi mundur që të mbajmë një standard të tillë pa humbje jete. Dje ishte një ditë shumë e rëndë.
Ne ishim dje në aktivitete tona dhe rastësisht shohim një zonjë që kishte ndaluar buzë lumit dhe ishte pothuajse e rraskapitur dhe ishte në gradët e fundit të jetës. E morëm e veshëm me rrobat tona. Tani që ka ujë shumë duhet të jesh i veshur me një veshje termike për të mbajtur një temperaturë konstante të trupit. Duhet të ketë një skafandër.
Ne e gjetëm buzë lumit, ishte në një gjendje të vështirë. Pasi mori veten, ne e morëm e shoqëruam i dhamë ndihmën e parë. Shumë shpejt u nismë drejt kanionit nuk gjetëm asgjë. Pamë në të gjitha pikat ku mendonim se mund ta gjenim. Tani mendojmë se trupi është zhytur poshtë ujit dhe është e vështirë të gjendet”, – tha Spathara.
