Një 21-vjeçar shqiptar është arrestuar mbrëmjen e kaluar në Greqi, pasi dyshohet se është një nga dy autorët e dhunës së një 16-vjeçari pasi kishte veshur xhaketën e PAOK-ut.
Mediat e huaja raportojnë se ndaj 21-vjeçarit është ngritur një dosje për plagosje trupore si dhe për grabitje, ndërsa do të dërgohet në prokurori për ndjekje penale.
Njëkohësisht vijojnë hetimet për identifikimin e bashkëpunëtorit të tij.
Si ndodhi ngjarja?
Sulmi ndaj 16-vjeçarit ndodhi pasditen e së martës, në zonën e Agios Pavlos në Selanik, kur dy persona e sulmuan në mes të rrugës.
Gjithçka ka ndodhur në orën 19.30 kur autorët e rinj kanë pikasur 16-vjeçarin duke ecur në rrugën “Michail Karaoli” dhe sipas dëshmitarëve okularë e kanë rrahur me shqelma dhe grushta pasi kishte veshur një bluzë të një grupi të ndryshëm nga ai mbështeste.
Sipas informacioneve, i mituri që u dhunua kishte veshur një fanellë me shenjat e skuadrës së PAOK-ut, ndërsa nuk dihet se për cilin ekip mbështesin dy personat që e rrahën.
Pasi e kanë rrahur në kokë dhe trup, më pas e kanë lënë të gjakosur në asfalt dhe kanë ikur. Njerëzit e lagjes që kanë vënë re ngjarjen dhe kanë dëgjuar zërat e të riut kanë lajmëruar policinë dhe ambulancën, ndërsa 16-vjeçarin e kanë dërguar në një farmaci aty pranë për të marrë ndihmën e parë.
Sipas farmacistes, viktimës i kishte rrjedhur gjak nga hunda dhe ndër të tjera kishte marrë goditje në sy.
Burimi: Protothema.gr
