Ish-deputeti demokrat, Aleksandër Biberaj ka komentuar deklaratat e kryeministrit Rama se nuk do të japë financime për ato bashki që do të fitohen nga opozita. Biberaj shprehet se për këtë deklaratë të kryministrit Rama duhet të kishte reaguar komuniteti ndërkombëtar, KQZ dhe drejtësia.
Biberaj e konsideroi Ramën si një rrugaç dhe ordiner, i cili po bën presion dhe po përpiqet të përhapë dhunë.
Ndërsa duke komentuar kandidatët për kryetar bashkie, Biberaj u shpreh se Rama gjysmat i ka në burg dhe të tjerët në kërkim.
“Ky gjysmën i ka bë burg, gjysmën i ka në kërkim. Kriteri është kush i çon para më shumë sulltani. Kandidatët tanë nuk duhet të lejohet të manipulohet asnjë vote. Përndryshe nuk duhet ta kishin marrë përsipër. Ata vjedhin edhe natën, ata janë grup i strukturuar kriminal, ata do përpiqen. Asnjë votë nuk duhet të vidhet”, tha ai për Panorama TV.
Pjesë nga intervista:
Si e keni parë fushatën?
Biberaj: Ai është një ordiner, një rrugaç, ka 10 vite qe qeverise dhe nuk bën gjë tjetër vetëm sulmon opozitën.
Mendoni që po politizohet kjo fushatë?
Biberaj: Është politizuar në mënyrë të tejskajshme. Çdo kryetar bashkie del me një bilanc. Këta janë halabak, janë rrugeçër ordinerë. Ai thotë mos votoni opozitën sepse nuk do marrin para nga buxheti. Ato para nuk janë të Edi Ramës.
E kupton çfarë degradimi psikik ka arritur ky njeri. Ne jemi anëtar të këshillit të Evropës që nga 1995 dhe rekomandimet e tyre janë të detyrueshme.
Buxheti i shteti në çdo vend të botës do shkojë tek qytetari, ai thotë mos votoni ata se nuk do çoj asnjë para.
Qëndrimi i kryeministrit është i papërgjegjshëm, nuk ka asnjë normë demokratike. Nuk ka një fushatë në nivel vendor. Kjo i intereson Edi Ramës.
Duke u ndalur te deklaratat e Ramës që thotë se nuk do investojë në bashkitë ku do fitojë opozita, mendoni që duhet të kishte një reagim nga OSBE ODIHR dhe të kishte hetim?
Biberaj: Duhet të reagonte komuniteti ndërkombëtar, KQZ dhe patjetër sistemi i drejtësisë. Ai po bën presion, po përpiqet të përhapë dhunë. Këtu nuk ka institucione, ndërsa ndërkombëtarët janë të korruptuar, janë ushtarë të bindur. Ndërkombëtarët janë bashkëpunëtorë me qeverinë. Kjo është luftë për jetë e vdekje. Nuk është çështja Berisha apo Meta apo Rama, këta janë në mbyllje të ciklit. Kjo klasë politike duhet ti lerë vendin një klase të re. Në 14 maj duhet të bëhet rotacioni.
Kë shihni si kandidat potencial?
Biberaj: Unë përmenda kryesorët, Këlliçi duhet ta fitojë bashkinë Tiranë, Igli Cara duhet ta fitojë Durrësin dhe Boçi Elbasanin. Këto të treja patjetër duhen fituar që opozita të nisë protestat për të shkuar ne zgjedhje të parakohshme. Shkodra nuk diskutohet. Janë shanset që ne të fitojmë një mazhorancë absolute. Ka edhe vështirësi në Fier, por Korça mund të fitohet.
