“Hajde në debat, ku të duash, në cilën studio të duash, për çdo temë që të duash!”.
Kjo ishte sfida e hapur që kandidati demokrat për bashkinë e Tiranës, Belind Këlliçi i bëri paraditen e sotme Erion Veliajt, duke i kërkuar ballafaqim të programeve për kryeqytetin dhe debat për secilën prej temave që kryebashkiaku preferon, përfshirë edhe spekulimet që socialistët kanë ngritur për diplomën e gjimnazit të tij.
Teksa Veliaj pak ditë më parë iu shmang pyetjeve mbi debatin e kërkuar që prej nisjes së fushatës elektorale nga Këlliçi, duke kërkuar ballafaqim me ish-kryeministrin Sali Berisha, kandidati i koalicionit opozitar zgjodhi ta ftojë sërish rivalin socialist për përplasjen televizive live që e kërkojnë mbi 70% e qytetarëve.
Nga studio e emisionit “Kafe Shqeto”, Këlliçi iu drejtua Veliajt duke thënë: “Ku je mo, pse ke humb? Hajde në debat”.
Kandidati i opozitës i tha drejtuesit të emisionit nëse ia kishte numrin e telefonit kryebashkiakut aktual, t’i kërkonte një debat për Tiranën, problemet e qytetit, dhe për çdo çështje që shqetëson atë dhe banorët.
“Edhe për diplomat”, tha Këlliçi.
Debati mes dy kandidatëve për Bashkinë e Tiranës po kërkohet me ngulm nga opinioni publik dhe në sondazhet e fundit, del se rreth 70 përqind e qytetarëve e duan ballafaqimin e alternativave të Këlliçit dhe Veliajt.
