“Për mendimin tim, në 14 Maj ty që ta kanë vrarë gjyshin komunistët se ishte ballist, është mirë që t’ia kursesh rrotullimin shtatë herë në varr kur të vesh kryqin te “Like floriri”, është mirë të mos shkosh fare. Nuk ka nevojë. Mos na e jep ne votën, se të pengon kjo lufta me komunizmin, por mos shko fare. Lërë se gjynah gjyshi”.
Këto rreshta të thëna dje nga kryeministri Edi Rama gjatë një takimi elektoral në Mallakastër, ishin vazhdim i presionit, kërcënimeve dhe klimës dekurajuese që shefi i qeverisë dhe socialistët po tentojnë të mbjellin para zgjedhjeve të 14 majit, për të ndalur qytetarët që të shprehin të lirë vullnetin e tyre.
Rama e nisi serinë e kërcënimeve në Kamëz duke thënë se qeveria qëndrore do të ndalë investimet dhe financimet e projekteve në bashkitë që do të fitohen nga opozita në këto zgjedhje.
Në shkelje të hapur të Kodit Zgjedhor e Kushtetutës, kryeministri i ka qëndruar sot stohik idesë së tij të motivuar nga dëshira për zgjedhje mono-partiake në vend si në vitin 2019.
Teksa foli për mediat pas mbledhjes së Kryesisë së PS, gazetarët e vendosën me shpatulla pas muri Ramën lidhur me deklaratën e djeshme ku kërkoi nga demokratët që mos të dalin në votime.
I pyetur nëse thirrja e tij është joetike dhe në shkelje të ligjit, Rama u rrek të minimizonte efektin e deklaratës së tij, duke u shprehur se iu drejtua vetëm ‘ballistëve’, si një pjesë e vogël elektorati, vota e të cilëve dihet ku shkon.
“I fola një pjese të vogël të elektoratit të anës tjetër, e cila edhe pse e vogël në masë, vota e tyre ka rëndësi. Ata përfaqësojnë një komponent të fortë besnikërie sepse kanë lidhje të forta me të kaluarën. Unë e di se shumë prej këtyre do të votojnë nga ata edhe për ne”, tha kryeministri.
Ndërkohë, sa i përket mbledhjes së Kryesisë së PS, Rama duket se ka dhënë direktiva të reja përsa i përket tubimeve, të cilat nuk do të organizohen më me pjesëmarrje të vogël dhe fokusin te mbjellja e pemëve.
Në gati dy javë të mbetura, PS do të përshpejtojë ritmin e fushatës dhe pritet të ketë tubime më të mëdha se ato që jemi mësuar deri tani.
