Në prezantimin e kandidatëve të koalicionit opozitar “Bashkë Fitojmë” për Sarandën dhe Konispolin, kryedemokrati Sali Berisha u ndal gjatë të figura e pastër e emrave të dalë nga “Primaret” , të cilët u kërkojnë votën qytetarëve më 14 Maj.
Berisha tha se kandidatët e opozitës përfaqësojnë dinjitetin dhe se primaret ishin një standard nga më të përparuarit. Ndaj sipas tij, Fatmir Shero dhe Ardit Cikuli janë dy njerëz punëtorë dhe të përkushtuar, të cilët duan që të menaxhojnë më së miri qytetet ku janë lindur, rritur dhe punojnë.
“Shumë herë kam ardhur në Sarandë, kam paraqitur kandidatë për deputetë, kam paraqitur kandidatë për kryetarë bashkie, por kësaj here është më e veçanta e jetës time. Sepse sot ne paraqesim kandidatë për kryetar të bashkisë së Sarandës dhe Konispolit, dy qytetarë shembullorë, dy njerëz, familjarë të shkëlqyer, dy punëtorë të virtytshëm. Dy njerëz, që e duan shumë Sarandën dhe Konispolin. Në dallim nga të gjithë të tjera, janë kandidatët tuaj, janë kandidatë të vullnetit tuaj, të votës tuaj, por në fakt edhe të dinjitetit tuaj. Sepse asgjë, nëse e marrim lirinë dhe e studiojmë, sa herë të vështrojmë mbi të, të përpiqemi ta zbërthejmë, gjithnjë në zemër të saj, do të gjejmë dinjitetin e njeriut”, tha Berisha.
Ish-kryeministri theksoi se kandidatë e “Bashkë Fitojmë” janë të vetëdijshëm se kanë çdo detyrim pafundësisht ndaj qytetarëve të tyre.
“Nuk janë kandidatët të kryetarit të partisë, nuk janë kandidatë të kryesisë së partisë. Ju garantoj se sado që në këtë Shqipëri me 1000 probleme, por ky standard është sot nga më të përparuarit që ekziston mbi tokë dhe ne duhet të jemi krenarë me këtë standard. Me primaret ne kemi shënuar një arritje të madhe. Ju dëgjuat programet e tyre, programe të një përgjegjësie të lartë. Programe të një përkushtimi dhe dashurit të vërtetë për komunitetin, për Sarandën për Konispolin, programe për të cilat kandidatët për qytetar të parë vendorë, synojnë të shënojnë kthesën e madhe, në këto dy zona ndër më të bukura e kësaj toke”, nënvizoi ai.
Më tej, lideri i opozitës u ndal te plaga më e rëndë që i shkakton sot dhimbje vendit, ajo e emigracionit, duke akuzuar kryeministrin Edi Rama se në 10 vite qeverisje ka larguar 1/3 e popullatës në vendet e BE-së.
Sipas Berishës fakti që shifrat tregojnë se shumica dërrmuese e personave që emigrojnë janë të rinj, tregon se Shqipëria e ka humbur një gjeneratë tjetër në emigrim.
“Pavarësisht resurseve të jashtëzakonshme që ka Saranda, që ka Konispoli, vitalitetit të burrave, grave, të rinjve të kësaj zone, përsëri sot Saranda është një tokë që braktiset. E kështu erdhëm ne në 8 vite të kësaj qeverie të humbasim 1/3 e popullatës, të humbasim më shumë se Shumica dërrmuese, 80% e këtyre që kanë ikur janë të rinj, nën 30 vjeç. A mund ta imagjinojmë pak për një moment se çfarë ka ndodhur me neve; kemi humbur më shumë se një gjeneratë dhe në rast se ecim kështu, si symbyllas, në rast se ecim kështu me indiferencë apo të mashtruar ju garantoj se pas 8 vitesh, ata 1 milionë shqiptarë më së paku do të marrin mbrapa edhe 1 milionë tjetër, çfarë do të mbesë këtu?”, theksoi ai.
Berisha kërkoi votën e qytetarëve në 14 Maj, duke nënvizuar se nuk duhet të lejojmë që Edi Rama të mbajë në këtë tokë vetëm trafikantët, qeveritarët dhe oligarkët.
“Pra është një moment kritik që kërkon një përgjegjësi të madhe nga ne. Kërkon, me 14 maj, të votojmë ndryshimin, vota jonë për ndryshimin, është votë për shpresë, është votë për të ardhmen”, u shpreh Berisha.
