Vetëm pak ditë pasi stafi mjekësor në QSUT asistoi në ndërhyrjen kirurgjikale të tij për të hequr apendicitin, kryeministri Edi Rama u rikthye të jetë aktiv në fushatën e socialistëve, duke dalë në krah të Rakip Sulit në Kamëz.
Teksa retorika politike kundër koalicionit opozitar “Bashkë Fitojmë” në fjalën e tij ishte e ashpër, Rama vëmendjen më të madhe e mori me lëvizjet e tij si kërcimtar tallavaje, pasi i kërkoi DJ të luante këngën e shumë kontestuar të fushatës së Ps.
Kryeministri nuk rreket t’i shpjegojë banorëve të Kamzës (shumica të moshuar) në takimin e tij elektoral, arsyet e vërteta se përse bijtë e tyre kanë braktisur vendin dhe t’u kërkojë falje për modelin e shëmtuar të qeverisjes së “Rilindjes”, por së bashku me një zonjë nis të kërcejë nën ritmin e tallavasë.
Misioni për të mos u përballur me realitetin e hidhur që ofron sot vendi dhe sfumimi i kërkesës së llogarisë nga qytetarët me “tallavanë” e pushtetit nga ana e Ramës, është kritikuar ashpër në një postim në Facebook nga nënkryetari i Partisë së Lirisë, Petrit Vasili.
Duke e quajtur kryeministrin hajdut të buxhetit të shtetit, Vasili ironizon modelin e fushatës që Rama po ndjek, duke thënë se me shumë gjasë “ i kanë hequr trurin dhe jo apendicitin”.
Duke e quajtur kryeministrin një “zorrë qorre”, Vasili thotë se ai vjedh pa mëshirë paratë e taksapaguesve pasi kujton se i ka lekët e buxhetit të shtëpisë së tij.
“Këtij Rames i paskan hequr trurin dhe jo apendicitin! Po dhe mjeket s’kanë faj, se ky zorrën qorre e ka ne tru! Ky zorra qorre ngaqë e vjedh pa mëshire buxhetin e kujton se i ka leket e shtëpisë! Ky zorra qorre është bere si kanoçet te bishti i qenit qe bëjnë zhurme dhe qesh tere dynjaja!”, shprehet Vasili.
