Një sherr që ka degraduar në përdorimin e armëve të ftohta ka sjellë plagosjen e dy të rinjve mesditën e kësaj të Premte në Rrëshen.
Blutë bëjnë me dije se dy të rinj, të identifikuar si Napolon Gjoka (19 vjeç) dhe Kledi Kaçi (20 vjeç), pas një sherri për motive të dobëta kanë plagosur njëri-tjetrin me thikë.
“Në Rrëshen, shtetasit N. Gj. 19 vjeç dhe K. V. 20 vjeç ( kushërinj), dyshohet që për motive të dobëta janë konfliktuar fizikisht si dhe kanë plagosur me mjet prerës (thikë) njëri – tjetrin.Si pasojë e dëmtimeve fizike të marra, ndodhen në spital për trajtimin e nevojshëm mjekësor”,- njofton policia.
Ngjarja ka ndodhur para pak minutave në shtëpinë e njërit prej të plagosurve, të cilët raportohet se janë kushërinj me njëri-tjetrin. Ndërkohë, është bërë transporti i tyre drejt spitalit ku ndodhen aktualisht jashtë rrezikut për jetën.
Grupi hetimor vazhdon veprimet hetimore për zbardhjen e plotë të rrethanave të ngjarjes.
