Kryeministri Edi Rama në orët e para të mëngjesit të së hënës iu nënshtrua një ndërhyrje kirurgjikale në ambientet e QSUT, pasi u diagnostikua me appendisit akut.
Sipas njoftimit të zyrës së shtypit në Kryeministri, Rama është paraqitur pak pas mesnate në QSUT me kriza dhe pas testimeve imazherike, me sugjerimin e stafit të mjekëve dhe anestezistëve, me në krye Prof. Arben Gjata ka hyrë në sallën e operacionit.
Gjata dhe kolegët që e asistuan në këtë ndërhyrje dhanë një deklaratë për mediat disa orë pas operacionit, duke sqaruar gjendjen shëndetësore të shefit të qeverisë.
Shef i shërbimit të kirurgjisë në QSUT tha për mediat se ndërhyrja është kryer me laparoskopi rreth orës 02:00, ndërkohë që gjendja shëndetësore e Ramës është e mirë.
Ai gjithashtu tha se nisur nga gjendja e kryeministrit, ai mund t’a lërë spitalin edhe brenda 24 orëve.
“Operacioni u krye me laparoskopi. Është intervenuar rreth orës 02:00. Isha unë, profesor Beqiri, Rahovica. Operacioni shkoi mirë, nuk ka temperaturë. Sot besoj do të fillojë dhe do të ushqehet dhe brenda 24 orëve do të largohet në shtëpi”, tha Gjata.
Ai iu përgjigj edhe interesit të gazetarëve lidhur me angazhimin në fushatën elektorale për zgjedhjet lokale të 14 majit nga ana e kryeministrit, duke thënë se mund të rinisë aktivitetet brenda 2 apo 3 ditësh.
“Nesër besoj se duhet të dalë nga spitali. Me laparoskopi koha e rikuperimit është shumë e shpejtë, brenda 2-3 ditësh. Kryeministri nuk duhet të tregojë ndonjë kujdes të shtuar. Ai mund të ecë që sot. Kryeministri komunikon normalisht dhe është i qetë”, shtoi Gjata.
LEXO EDHE:
Pati kriza gjatë mesnatës, kryeministri Rama bëhet operacion nga apandesiti
