Historitë e vjetra të bërrylave në PS dhe inatet e mbartura kanë bërë që ish-deputeti socialist Ervin Bushati kohët e fundit të rreshtohet hapur kundër kryebashkiakut të Tiranës, Erion Veliaj.
Me Edi Ramën që u përpoq ta sfumojë në takimin e çeljes së fushatës në Farkë, duke i kërkuar të ikë e të mbjellë ndonjë pemë se nuk kishte shkuar të dëgjonte fjalimin e tij, reagimi i Bushatit kundër rikandidimit është një tjetër goditje për Veliajn.
Ish-kreu i PS së Tiranës tha në SyriTV se nuk e mbështet Veliajn për një mandat të tretë, pasi selisa rozë nuk ka nevojë për një kryeministër hije që përdor kryeqytetin për të përmbushur ambiciet e tij politike.
“S’kam ndryshuar mendim. Unë kam thënë mendimin tim. S’ka nevojë për kryeministër në hije PS, që të përdoret si trampolinë. Megjithatë, forumet kanë vendosur të kandidojë, kështu që të gjithë janë pas vendimit të PS, këtë kemi ndryshe nga PD. E rëndësishme është të thuash mendimin tënd, ne kemi mundësi ta themi. Në të dy rastet ka një garë elektorale dhe një betejë politike. Gara elektorale e Belindit gati është e pamundur për mua, edhe matematikisht, betejën politike e ka të fituar, për të treguar që PD-ja e vërtetë nuk është ajo e vulës. Në anën tjetër garën e ka të lehtë kandidati i PS, betejën për të marrë vota sa PS në 2021, 200 mijë vota e ka të vështirë”, u shpreh Bushati.
Këto deklarata të ish-deputetit janë bërë të zakonshme në daljet e tij televizive dhe tregojnë një përplasje të heshtur në gjirin e Partisë Socialiste, që pikënisjen e ka patur në kohën kur Rama i besoi “Lali Erit” edhe drejtimin e degës së PS-së në kryeqytet, duke ia hequr kompetencat Bushatit.
Goditjen e fundit Bushati e mori në zgjedhjet e 25 prillit, pasi këtë herë “shpatën” e kishte mprehur Veliaj që u investua për t’i siguruar Fatmir Xhafajt, votat e nevojshme për të thyer herësin.
Dhe ish-ministri i Brendshëm ia doli që me 13450 votat e tij ta “djegë” kryetarin e PS, i cili mori vetëm 1862 vota preferenciale, duke u bërë kandidati më pak i votuar brenda 18-shes së sigurt.
