Hetuesit spanjollë njoftuan se kanë zbuluar “laboratorin më të madh të kokainës në Evropë”.
I vendosur në provincën e Pontevedras në veriperëndim të vendit, laboratori punonte gjatë gjithë orarit dhe prodhonte çdo ditë 200 kilogramë hidroklorur kokaine të gatshme për përdorim.
Objekti drejtohej nga tregtarë droge nga Meksika dhe Kolumbia.Gjithsej 18 persona, përfshirë shumë amerikano-jugorë, u arrestuan gjatë 14 kontrolleve nëpër shtëpi në katër rajone të Spanjës; Galicia, Madridi, Vendi Bask dhe Ishujt Kanarie.
Ata janë të gjithë në paraburgim. Gjithashtu, në bashkëpunim me policinë portugeze u sekuestruan 1.3 ton pastë kokaine dhe 151 kilogramë hidroklorur kokainë.
Kaq shumë pastë kokaine nuk është konfiskuar kurrë në një operacion të vetëm në Evropë, theksoi Antonio Duarte, kreu i njësisë antidrogë të Policisë Kombëtare.
Ai foli për një “goditje jashtëzakonisht të rëndësishme” kundër trafikut të drogës në Evropë.
“Krahas masave të tjera, në kuadër të hetimeve të nisura në muajin tetor, u bllokuan 17 prona dhe llogari të shumta. Kjo goditje kundër mafies së drogës konfirmon ndërkohë një prirje të re. Gjithnjë e më pak barna të gatshme për përdorim po eksportohen. Përpunimi kimik në laboratorët evropianë po rritet për të kursyer kostot. Kjo lidhet edhe me faktin se vlera e mallit të humbur në veprimet e konfiskimit nga autoritetet në Evropë është dukshëm më e ulët.”
