Një operacion i gjerë i zhvilluar nga policia katalane “Mossos d’Esquadra” në bashkëpunim me Gardën Civile Spanjolle ka çuar në goditjen e një rrjeti biznesi që furnizonte grupet kriminale shqiptare me pajisje për kultivimin e marijuanës në ambiente të mbyllura.
Sipas mediave spanjolle, rrjeti vepronte në rajone të ndryshme të Spanjës, përfshirë Katalonjën, Valencian dhe Granadën, ndërsa kishte lidhje të drejtpërdrejta me disa organizata kriminale shqiptare të përfshira në trafikun e drogës.
Hetuesit zbuluan lëvizje financiare që arrinin në rreth 80 milionë euro në llogaritë e një kompanie, e cila zyrtarisht kishte deklaruar vetëm 13 milionë euro të ardhura. Autoritetet dyshojnë se diferenca përfaqëson para të gjeneruara nga aktiviteti kriminal dhe pastrim parash.
Sipas hetimeve, rrjeti maskohej pas kompanive që shisnin produkte të ashtuquajtura “grow shop”, por në realitet furnizonte mafian shqiptare me të gjitha pajisjet e nevojshme për kultivimin e kanabisit, përfshirë llamba speciale, ventilatorë, plehra kimike dhe sisteme të tjera teknologjike.
Bizneset funksiononin në mënyrë të fshehtë, pa aktivitet të dukshëm tregtar dhe me hyrje të kontrolluara. Në shumicën e rasteve, ambientet qëndronin të mbyllura dhe përdoreshin vetëm në orare të caktuara për ngarkim-shkarkimin e mallrave, duke shmangur kështu vëmendjen e autoriteteve.
Hetimi, i nisur që në vitin 2023, ka zbuluar se rrjeti bashkëpunonte me të paktën gjashtë organizata kriminale shqiptare. Për të ruajtur anonimatin dhe për të shmangur gjurmimin e transaksioneve, pagesat kryheshin kryesisht me para në dorë dhe pa lëshuar fatura.
Autoritetet zbuluan gjithashtu një sistem të dyfishtë kontabiliteti: një zyrtar të deklaruar pranë institucioneve shtetërore dhe një tjetër të fshehtë, ku regjistroheshin fitimet nga aktiviteti i paligjshëm. Vetëm në këtë kontabilitet paralel janë identifikuar të ardhura prej 13 milionë eurosh.
Sipas policisë, rrjeti kishte zgjeruar aktivitetin edhe në Gjermani, duke krijuar një degë të posaçme për të shtrirë operacionet në vende të tjera europiane dhe për të qarkulluar shuma të mëdha parash përmes tregjeve si Holanda.
Zyrtarët spanjollë e kanë përshkruar organizatën si një “centrifugë të pastrimit të parave”, pasi fitimet nga trafiku i drogës riinvestoheshin vazhdimisht në biznese të reja, blerje pajisjesh dhe aktivitete të tjera për të futur paratë në ekonominë ligjore.
Operacioni vijon ende, ndërsa autoritetet nuk përjashtojnë arrestime të tjera dhe sekuestrime të mëtejshme pasurish të lidhura me rrjetin kriminal.
