Nga Boldnews.al
Si nikoqir, Rama mendon për prapa dhe para, kudo ku mund të gjejë një vrimë për ta mbullur. Qoftë edhe për pak, kryeministri mendon që të kursejë paranë publike, për ta çuar në shërbim të qytetarëve dhe të ngopen edhe më shumë me propagandë. Ai ka urdhëruar që paratë e përcaktuara për fushatë të shkojnë në mbjellje pemësh në bashkitë e vendit, që mbyll një vrimë të vogël.
Nikoqir, nuk ke çfarë t’i thuash në këtë drejtim. “Në ecim para, ta hongsha zemrën”- kështu është edhe teksti i këngës që PS do të përdorë për fushatë. Sesa ka kushtuar kjo këngë kryeministri ende nuk e ka bërë publike. Mund të jetë dhuratë nga tallavazhinjtë këngëtarë, por sërish çdo gjë ka një kosto. Ama Rama thotë jo më prapa…
Nikoqir u tregua edhe në hapjen e “fushatës modeste” kur mblodhi 61 kandidatët për kryebashkiakë në vend, bashkë me deputetët e tij dhe mbollën 61 pemë në Shëshin Skënderbej, fiks pas monumentit të heroit tonë kombëtar. Është një shesh i mirë për kullë, ama Rama vendosi të mbjellë pemë aty, ndaj e ka me vend epitetin e nikoqirit q ia kanë vendosur të tijët. Ajo që shitej për publikun dhe ajo që ishte e vërteta janë vite drite larg, pasi vetëm veshjet e deputetëtev dhe kandidatëve dhe disa ministreve me qafën plot bizhu, mund të kushtonin sa qindra pemë, bashkë me dronet me kamera. Po rëndësi ka që Rama të shfaqet si nikoqir.
Fill pas nikorqirllëkut në hapjen e fushatës e pa vetën në evenimentin e Lali Erit, që e kishte lëshuar ca dorën me pije, qofte, e mish të pjekur në një “koncert festiv” me aktivistët Rilindas, që kur panë Ramën nisën të brohorisnin edhe më shumë. Kulmi ishte kur në sfond dëgjohen kënga “Jo më prapa”…
E gjithë kjo shfaqje është një hi i madh që tentohet të hidhet në sytë e njerëzve. Rama kërkon që të mos mbahen “mitingje madhështore”, të mos bëhen “reklama televizive” dhe të mos përdoren “autobusë me Rilindas”. Në fakt fushata e vërtetë është në tjetër vend. Çdo ditë e mbrëmje vonë, kandidatët për kryebashkiakë të PS-së bashkë me të gjitha administratën në varësi të tyre punojnë si “njësiti gueriL”, duke qarkulluar listat me zgjedhës nga duart e patronazhistëve.
Punohet me telefonata, takime nëpër zguqe me premtime për vende pune, zgjidhje problemesh personale, pa harruar mjetin që e hedh votën përpjetë… padyshim që punën kryesore e bëjnë bosët e biznesit dhe të krimit të cilët në këngën e fushatës së PS-së u pëlqen më shumë fraza: “ta hongsha zemrën”. Kjo është forma që kushton shumë më shumë se një fushatë e hapur, ku takimet kanë një kosto organizimi dhe shpenzimesh.
Ruajtja e imazhit është e rëndësishme për Ramën i cili në vitin e dhjetë të qeverisjes po shitet si një nikoqir që kollondris mirë buxhetin e shqiptarëve dhe është fort dorështrënguar në “luksin e fushatës”.
