Për kreun e opozitës Sali Berisha, kryeministri Edi Rama është drejtuesi i mafies shqiptare.
Në një takim me strukturat në selinë blu, Berisha dolli në vëmendje një intervistë të kreut të kreut të SPAK, Altin Dumani për italianen “La Repubblica”, transmetuar një ditë më parë.
Dumani tha mes të tjerash gjatë intervistës se “me sa dimë, sot nuk mund të themi se kemi një udhëheqës të vetëm të grupeve shqiptare apo një ‘shef liderësh’”.
Por, për kreun e PD nuk është kështu. Ai u shpreh këtë të Martë se koka e mafies është Edi Rama.
“Një gazetar e pyeste kreun e skapit, i thoshte a ka në Shqipëri mafie të strukturuar. Kreu i skapit i përgjigjej nuk ka taman, se nuk kanë kryetar. Nuk guxonte të thoshte se këtu është shteti, mafia. Në Shqipëri në dallim nga vendet e tjera, atje ka Ndrangheta boss, ka Sacra Corona Unita, kurse këtu është Edi Rama, është qeveria. Është absolutisht ajo që shkruante Bild, shteti i mafias së drogës”, theksoi Berisha.
“Dhe kandidatët e kësaj mafie janë kandidatët e vesit, shtoi ai, janë kandidatë që kanë vjedhur me tendera, janë kandidatë të lidhur me një mijë fije me trafikantët, janë kandidatë të cilët u rëndojnë thasët me euro qytetarëve”.
“U rëndojnë lidhjet me drogën, u rëndon fakti se për ta nuk ka votuar një socialist i vetëm, të gjithë kanë dalë nga sirtarët e Edi Ramës, u rëndon tmerrësisht vetë Edi Rama. Çdo kandidat e din, se i ka kohërat e numëruara. Se mëkatet e tij janë të pafundme, se është i vetmi kryeministër që është në hetim ndërkombëtar dhe së shpejti dhe kombëtar. Është i pashpresë, kjo është e vërteta”, tha më tej.
Ai u ndal dhe të shifrat që tregojnë emigrimin masiv. Për premtimet e Ramës për rritje pagave, tha se nuk janë bërë asnjëherë në vend dhe janë në kundërshtim me ligjin. Kryedemokrati e cilësoi kryeministrin kampionin e mashtrimeve. “Shqiptarët nuk e besojmë më”, tha Berisha.
Solli po ashtu në vëmendje aferën e inceneratorëve duke akuzuar kryebashkiakun e Tiranës Erion Veliaj për marrje të parave nga Irani.
“Ju lutem, çdo qytetar të Tiranës ta pyesni, a u akuzua ky për djegësat, se qarkullon paratë e Pasdaranit. Ky se hap dot gojën, nuk çel dot gojën se Bruno Presseci, pronari me dokumente i djegësit të Tiranës, është ortak i Ali Aliabatit. Tani e përzunë dëshmitarin, Gabrielin që ishte me ta. Pasi e përzunë pa drejtë kthimi për 5 vite, për shkak të hetimit, tani ai flet, bën detyrën si qytetar dhe flet aty ku është dhe po i zbërthen. Ai thotë se djegësi i Tiranës përdoret për larjen dhe riciklimin e parave nga Bruno Pressezi dhe Ali Aliabati. Pra ky është rivali i Belind Këlliçit. Njeriu që po vjedh bashkinë çdo ditë, duke asfaltuar me mjete të bashkisë dhe duke ua faturuar firmave të veta private”, tha kreu i PD.
Ironizoi po ashtu çeljen e fushatës nga Rama. “Pavarësisht se çfarë funksionesh ke, paranoja ka forma të njëjta. Hapi fushatën me nomenklaturën e tij, u mbante fjalime Belindës, Spiropalit, Ulsi Manjes dhe ata duartrokisnin. Nuk kisha parë ndonjëherë komedi si kjo”, tha Berisha.
Fushatën e PD e krahasoi me atë të vitit 1992. “Nga viti 1992, kjo është fushata e cila karakterizohet nga një optimizëm, nga një besim, nga një shpresë e madhe e qytetarëve shqiptarë, besim tek fitorja. Ju, se jeni çdo ditë në terren, kudo që hidhni hapin, dëgjoni qytetarë, qytetare, të ju thonë se kemi frymë të shkëlqyer. Çfarë është kjo? Fryma e shkëlqyer është besimi në fitore, qytetarët e ndjenjë se fitorja po afron çdo ditë”, tha Berisha.
Për dyshen Rama-Veliaj tha se ekziston një armiqësi mes tyre që shfaqet me simbolika.
“Erion Veliaj u tha qytetarëve të Tiranës, se kur Edi Rama ishte kryetar bashkie ju merrnit vetëm 2 orë e gjysëm ujë. Vetëm dy orë e gjysëm ujë. Edhe këtë e gënjeu, se nuk mund të lëshojë një fjalë pa gënjyer, por këtë e tha. Dhe ky po ua kthen me pemë. Po mbjell një muaj rresht 60 pemë në ditë, 1800 pemë, për ti thënë se ai pylli yt me 1 milionë pemë është 1800 herë mashtrim. Pra, se kanë të bëjnë, se beteja zhvillohet edhe me simbolika. Armiqësia e tyre është shumë e thellë, jo vetëm personale. Edhe klanet i kanë. Kokën ti hanë njëri-tjetrit, populli i Tiranës do të ju japë përgjigjen atyre me 14 maj. Se nuk jemi ne për të qajtë hallet e dy, do të thosha, dy individëve që përbëjnë në shumë aspekte figurat më negative të politikës shqiptare në kohëra“, deklaroi kryedemokrati.
