Kreu i Partisë së Lirisë, Ilir Meta ka zhvilluar sot një takim me qytetarët në Elbasan. Në fokus të këtij takimi qëndronte familje, ndërsa ka shpalosur edhe programin që sipas tij do t’i vijë në ndihmë familjeve shqiptare.
Kandidati i opozitës për bashkinë e Elbasanit, Luçiano Boçi në tryezën e organizuar nga PL, tha se gratë duhen mbështetur në jetën e tyre në familje dhe karrierën profesionale për shkak të rolit të trefishtë që kanë në shoqëri.
Gjatë fjalës së tij, Boçi tha se familja është thelbi dhe vlera e shoqërisë që ecën përpara dhe zhvillohet.
“Kjo goditje mbartet te familja shqiptare. Ka një agresion ndaj familjes në aspektin e zbatimit të disa agjendave që në pikëpamjen e familjes tradicionale janë të papranueshme. Sepse atësia dhe amësia janë thelbi i familjes, dhe jo prindi 1 dhe prindi 2. Një familje e shëndoshë është vlera e një shoqërie që ecën përpara dhe zhvillohet. Unë takimin e parë e kam nisur me gratë e Partisë Demokratike. Nuk e nisa kot sepse thashë që në çdo politikë fokusi është familja. Amësia është thelbi i familjes që lidhjet me kujdesin e atësisë. Nëse do nisesha nga rrëfenjat profetike do të tregoja të bukurën për gruan që zoti e krijoi nga brinja e burrit dhe nuk e vendosi as sipër kokës së tij dhe as poshtë këmbëve por afër zemrës. Vëmendja ime është te ekonomia, te arsimi. Të shëndetësia dhe te turizmi që kanë si qëllim shëndoshjen e ekonomisë së familjes shqiptare. Gruaja në Shqipëri ka një jetë të trefishtë. Është nëna që rrit fëmijët, ka jetën e saj profesionale të cilës duhet t’i përkushtohet. Kjo krijon këto lloj vështirësish që duhen konsideruar dhe shoqëria dhe pushtete politike duhet të marrin iniciativa për te lehtësuar pozicionin e gruas. Investimi për fëmijët është investim për gruan”, tha ai.
