Edmond Miza nga fshati Madhesh i Bashkisë së Matit, u rikthye këtë të Martë në Prokurorinë e Posaçme lidhur me një kallëzim ndaj kryebashkiakut Agron Malaj, dhe vëllait të tij Fatos Malaj.
Për mediat, ai tha se kryebashkiaku ka favorizuar vëllain e tij për ndërtimin e një HEC-i, duke shpërdoruar detyrën dhe duke favorizuar kundër ligjit familjarët e tij.
Edmond Miza pretendon se atij dhe disa banorëve të tjerë, u është falsifikuar firma. Sot, ai u paraqit në SPAK për ti vënë në dispozicion organit të akuzës, ekspertizën kaligrafike që sipas tij provon falsifikimin.
Kallëzimi është bërë 2 vite më parë, ndërsa Miza tha se prej kaq kohësh nuk ka dijeni se çfarë ka ndodhur me hetimet teksa iu drejtua SPAK-ut edhe me një kërkesë për informacion.
