Na ndajnë vetëm 4 ditë nga nisja zyrtare e fushatës elektorale, por kampet politike kanë ndezur motorët prej kohësh për të paraqitur alternativat e kandidatëve të tyre për zgjedhjet e 14 majit te qytetarët.
Për kandidatin e koalicionit “Bashkë Fitojmë” në Elbasan, Luçiano Boçi, është e rëndësishme që të ketë një ballafaqim mes tij dhe kryebashkiakut Gledian Llatja, në mënyrë që qytetarët të vendosin se kush është drejtuesi i denjë.
Për këtë, Boçi ka ftuar kundërshtarin socialist në një përballje live në televizion, por u ndal të theksonte se Llatja nuk ka bërë asgjë për qytetin dhe duhet të japë llogari para qytetarëve.
“Unë e shoh një kundërshtar i cili duhet të përgjigjet dhe duhet të japë llogari. Nuk dua të futem fare te cilësitë individuale, nuk merrem fare me cilësitë individuale të kundërshtarit tim, por merrem me sjelljen e tij drejtuese përgjatë 4 viteve. E udhëzoj dhe e orientoj që së pari të japë llogari për atë që ka bërë dhe nuk ka bërë për Elbasanin. Faktet ne i kemi dëshmuar dhe të japë llogari për atë pjesën e metodave parapolitike që i bën sot në kundërshtim me Kodin Zgjedhor.
Njëkohësisht, thjesht e ftoj, e kam shumë miqësore, të vijë në debat, mundësisht edhe te studio juaj, apo në çfarëdo studio dhe të ballafaqojmë gjithçka që kemi për t’i paraqitur qytetarëve të Elbasanit. Pasi të dëgjojnë këtë ballafaqim le të jenë qytetarët e Elbasanit që të vendosin”, theksoi ai.
