Kryetari demokrat Sali Berisha dhe kreu i PL-së Ilir Meta ndodhen në Durrës ku prezantuan kandidatin e koalicionit “Bashkë fitojmë” në zgjedhjet vendore, Igli Cara.
Berisha shoqërohej nga drejtuesi politik i qarkut, Oerd Bylykbashi dhe deputetja Albana Vokshi.
Bylykbashi tha se më 14 maj durrasakët kanë një detyrë, të votojnë për të ndërshkuar pandëshkueshmërinë dhe arrogancën e personave që qeverisn Durrësin.
Ndërsa kreu i PL-së bëri thirrje që të vazhdojnë të bashkuar drejt 14 majit për t’i thënë “Po” ndryshimit me Igli Carën.
Ilgi Cara, gjatë fjalës së tij, tha se pasuritë natyrore më keq se në Durrës nuk janë menaxhuar gjëkundi në Shqipëri, duke cenuar edhe identitetin kulturor. Ai foli më tej edhe për betonine Dakos ku tha se betonizuan qytetin, zunë detin me ndërtime e cenuan vijën bregdetare.
“Të gjithë biem dakord që zgjedhjet e 14 Majit kanë rëndësi të jashtëzakonshme për fatin e Durrësit dhe të Shqipërisë.
Të gjithë biem dakord që eksodi i viteve 90, shpopullimi i vendit në këto vite të fundit nuk janë e njejta gjë, të gjithë e dimë që fëmijët tanë po ikin dhe duan të ikin.
Të gjithë biem dakord se pasuritë natyrore më keq se në Durrës nuk janë menaxhuar gjëkundi në Shqipëri, duke cenuar edhe identitetin kulturor.
Të gjithë biem dakord që për betonin e Dakos betonizuam qytetin, zumë detin me ndërtime, cenuam vijën bregdetare.
Nëse do të gjenin disa fjalë për të përshkruar bashkinë e këtyre viteve, ato janë arrogancë, mungesë transparence dhe larg qytetarit, një bashki si agjenci shërbimesh e qeverisë, madje të duket sikur ka drejtoreshë qeverie dhe kryetare bashkie.”– tha Cara.
