Barcelona e ka vendosur njërën dorë te titulli kampion këtë sezon, teksa kryeson kampionatin me 12 pikë më shumë se Reali, kur kanë mbetur edhe 11 ndeshje për t’u luajtur.
Tashmë klubi katalanas është duke aspiruar për më shumë, teksa i ka hedhur “grepat” te diccka historike dhe ka kërkuar që Federata Spanjolle, të njohë titullin e fituar në vitin 1937, në periudhën e luftës civile.
Njohja e atij kampionati është një pretendim i vjetër i klubit blaugranas që deri më tani kishte rënë në vesh të shurdhër. Megjithatë, javën e kaluar Federata njohu fitimin e Kupës së Mbretit të Levantes në të njëjtin vit, fakt që përfaqëson një precedent ligjor dhe që ka riaktivizuar kërkesën e Barcelonës, e cila tashmë ia ka dërguar organeve federative.
Kujtojmë që në një situatë të ngjashëm ndodhet edhe Tirana, të cilës i janë hequr 3 tituj kampion, bëhet fjalë për vitet 1939, 1942, 1967. Nuk dihet nëse kjo situata në Spanjë do të nxisë edhe bardheblutë për të kërkuar llogaritjen e atyre titujve kampionë.
Në vitet 1939 dhe 1942, kampionati kombëtar i futbollit u zhvillua në kushte aspak normale dhe nën pushtimin fashist.
Për këtë, FSHF më vonë vendosi që për ato dy sezone mos kishte fitues, për vetë faktin e zhvillimit të ndeshjeve në Luftën e Dytë Botërore.
Tirana ka fituar titullin edhe në 1967. Ndeshja e fundit me Partizanin u nda 2-1 për bardheblutë, teksa të nesërmen në gazetë qarkulloi lajmi i dënimit të Tiranës dhe Partizanit me humbje në tavolinë dhe heqjen e tri pikëve.
Me urdhër të Ministrisë së Brendshme të kohës në sistemin komunist, vetëm me dënimin e Tiranës në këtë duel, Dinamo që ishte disa pikë larg mund të shpallej kampion në javën e fundit.
