Premtimin e kryeministrit Edi Rama për rritjen e pagës minimale në 90 mijë lekë të reja brenda dy viteve e gjysëm dhe shpërndarjen e shpërblimit prej 5 mijë lekë të reja për pensionistët 40 ditë para zgjedhjeve, akademiku Artan Fuga e sheh si propagandë të llahtarshme.
Teksa mbajti fjalën e tij në një takim të Qëndresë Qytetare për zgjedhjet vendore të 14 Majit, Fuga ironizoi premtimet e kryeministrit, duke theksuar se vijnë në një kohë kur elektorati gjithmonë e më tepër po përbuz politiken.
Sipas akademikut, në kohë të tilla politika shkon më shumë drejt çmendurisë duke premtuar gjëra që kurrë nuk i përmbush.
“Më 15 maj do të kemi rroga të dyfishuar. Se çfarë lidhje ka paga mesatare me zgjedhjet lokale, hajde e mere vesh ti. Ilaçet do t’i kemi falas. Ne do të na rriten rrogat në stratosferë dhe nuk do të kemi nevojë të harxhojmë para sepse gjithçka do ta kemi falas. Po çfarë i keni këto”, u shpreh Fuga.
Sipas akademikut të njohur, për t’i shpëtuar kësaj propagande të llahtarshme, nevojitet kulturë e re e inxhinierisë sociale dhe çështjeve të vogla të qytetit, brenda një modeli të ndërtuar mbi vijat bazë.
