Kryeministri i Kosovës, Albin Kurti ka përkujtuar masakrën e 24 viteve më parë të familjes Berisha në Suharekë që u vranë nga forcat serbe.
Kurti poston foto nga muzeu i Martirëve të familjes Berisha, teksa shkruan se kjo është e vërtetë kriminale e shtetit të Serbisë, që nuk mund të zhduket e as harrohet.
Mirëpo ajo që bie në sy është që Kurti nuk ka postuar në rrjete sociale ende asnjë foto nga takimet që ka zhvilluar në Shqipëri me presidentin Bajram Begaj, kryeministrin Edi Rama dhe kryetaren e Kuvendit Lindita Nikolla.
Postimi i plotë i Kurtit:
“Para 24 vitesh, forcat serbe vranë dhe masakruan 50 anëtarë të familjes Berisha në Suharekë. Mes tyre edhe 11 fëmijë. Pas vrasjeve, rrëmbyen edhe kufomat. Zhdukën kufomat, në përpjekje të zhdukjes të së vërtetës.
Por kjo e vërtetë kriminale e shtetit të Serbisë, nuk mund të zhduket e as harrohet. Kjo është e kaluara jonë e cila nuk kalon.
U përkulemi për forcën e pashembullt të mbijetuarve të vetëm të kësaj masakre, zonjës Shyhrete, zonjës Vjollca dhe Gramozit.
Përkulemi me nderim të përjetshëm para të gjithë atyre që u flijuan.
I përjetshëm qoftë kujtimi për ta!“
