Një 44-vjeçar është arrestuar nga policia e Tiranës pasi akuzohet për shpërndarje kokaine, kryesisht në zonën e ish-Bllokut në kryeqytet.
Në kudër të aksionit të koduar “Doses” u arrestua Leonard Abdia, ndërsa u sekuestruan 80 doza kokainë, 147 900 lekë të rinj dhe 190 euro, të dyshuara të përftuar nga shitja e drogës, një automjet dhe dy aparate celulare.
Aksioni
“Shërbimet e Komisariatit të Policisë Nr. 2, në bashkëpunim me shërbimet e Seksionit për Hetimin e Narkotikëve, në vijim të operacioneve për goditjen e veprimtarive kriminale në fushën e narkotikëve, bazuar dhe në informacionet e siguruara përmes inteligjencës informative, për një rast të shpërndarjes së lëndëve narkotike në zonën e ish-Bllokut, kanë organizuar dhe finalizuar operacionin policor të koduar “Doses”. Si rezultat i këtij operacioni, u arrestua në flagrancë shtetasi L. A., 44 vjeç, banues në Tiranë, për veprën penale “Prodhimi dhe shitja e narkotikëve”, njoftoi policia.
“Shërbimet e Komisariatit Nr. 2, e kanë lokalizuar dhe ndaluar këtë shtetas, në zonën e ish-Bllokut, të cilit gjatë kontrollit fizik, i gjetën 51 gram lëndë narkotike kokainë, të ndarë në 80 doza, gati për shitje dhe shuma parash e parave 147 900 lekë të rinj. Nga veprimet hetimore ka rezultuar se 44-vjeçari, pasi siguronte lëndë narkotike kokainë, e shiste më pas në doza, në zonën e ish-Bllokut”, shtuan të njëjtat burime.
