Nga Boldnews.al
Gjyqtari special paraprak ka ndryshuar akuzat për Alqi Bllakon dhe Arben Dervishaj, të dy të përfshirë në aferën e inceneratorit të Fierit, duke lehtësuar ndjeshëm pozitën e tyre, nëse shpallen fajtor në përfundim të procesit gjyqësor.
Bllako, ish-Sekretar i Përgjithshëm i Ministrisë së Mjedisit në kohën e miratimit të kontratës koncesionare për impiantin e mbetjeve në Fier, në vitin 2017, si dhe deputet i Partisë Socialiste në momentin e arrestimit, në Prill 2022, akuzohej nga Prokuroria SPAK për veprat penale “Shpërdorimi i detyrës”, në bashkëpunim, “Korrupsioni pasiv i funksionarëve të lartë shtetërorë ose i të zgjedhurve vendor”( dy herë).
Por, Gjykata e Posaçme Anti-Korrupsion, në seancën paraprake të zhvilluar këtë të Premte, ka pasur një qëndrim të ndryshëm mbi akuzat e ngritura nga SPAK për Alqi Bllakon.
Sipas gjyqtarit paraprak, bazuar në dosjen hetimore të përcjellë nga Prokuroria për gjykim, Bllako duhet të akuzohet për “korrupsion pasiv të funksionarëve publikë”, duke mos e konsideruar Bllakon si “zyrtar të lartë”.
Cila është diferenca?
Neni 260 i Kodit Penal, “Korrupsioni pasiv i zyrtarëve të lartë…”, ka një marzh dënimi nga 4 deri në 12 vjet burgim.
Ndërkohë që gjykata vendosi që Bllako të akuzohet për “korrupsion pasiv i funksionarëve publikë..”, sipas nenit 259 të Kodit Penal, që parashikon një marzh më të ulët dënimi, e konkretisht nga 2 deri në 8 vjet burgim.
Po ashtu, Gjykata ka vendosur të rrëzojë dy nga tre akuzat që SPAK kishte ngritur ndaj Arben Dervishaj, mbikqyrës i punimeve të inceneratorit të Fierit dhe njëkohësisht zyrtar i lartë në Federatën Shqiptare të Futbollit (FSHF).
Dervishaj akuzohej nga Prokuroria e Posaçme për “Shpërdorim detyre” dhe “korrupsion pasiv i personave që ushtrojnë funksione publike”.
Në bazë të këtyre veprave, Dervishaj rrezikonte dënimin deri në 7 vjet për “Shpërdorim detyre”, sipas nenit 248 të Kodit Penal; si edhe nga 2 deri në 8 vjet burgim për “Korrupsion pasiv të funksionarëve publikë”.
Ndërkohë, gjykata kërkoi nga SPAK që të riformulojë akuzat, duke e risjellë dosjen me akuzat e “Falsifikimit të dokumentave” dhe “korrupsion pasiv në sektorin privat”.
Me akuzat që vendosi gjykata, pozita e Dervishaj lehtësohet ndjeshëm.
“Falsifikimi i dokumentave”, i parashikuar në nenin 186 të Kodit Penal parashikon dënim nga 6 muaj deri në 4 vjet.
Ndërkohë, korrupsioni pasiv në sektorin privat”, parashikon 6 muaj deri në 5 vjet burgim, sipas nenit 164/b të Kodit Penal.
