Kryeministri Edi Rama ka habitur të gjithë duke hapur “thesin” e premtimeve elektorale.
Prej disa ditësh Rama ka nisur fushatën e tij të premtimeve imagjinare nga rritja e pagës minimale, bonus për pensionistët, deri tek mjekët të cilëve u ka premtuar se me “shkopin e tij magjik” do t’i bëjë me shtëpi të re.
Megjithëse vendi ynë prej më shumë se 10 vitesh po përballet me shpopullimin alarmant, qeveria e Edi Ramës nuk ka marrë asnjë politikë sociale për të ndaluar këtë fenomen që pritet të ketë pasoja akoma edhe më të rënda për vendin tonë.
Kur na ndajnë më pak se 2 muaj nga zgjedhjet lokale, Rama nuk e ndal imagjinatën e premtimeve madje këtë herë kreu i qeverisë thotë se çiftet e reja të mjekëve nuk do të kenë nevojë për të shkuar dhe punuar në Gjermani pasi qeveria do t’i favorizojë kushtet e blerjes së shtëpisë.
“Ne kemi vendosur të rrisim pagën për mjekët specialistë që është një fakt i kryer dhe paga e muajit prill do të jetë 5 mijë lekë të reja plus dhe do të rrisim pagën e mjekëve të përgjithshëm e do të përgatitemi për një rritje tjetër të pagës së tyre dhe kjo është e pamjaftueshme ndaj së shpejti do të publikojmë një tjetër program për mjekët ushtarakët e punonjësit e policisë për të garantuar strehimin e mjekëve të rinj specialistë kur të paraqiten çift jo tek. Për të gjithë ciftet e reja, të freskët në martesë të jenë subjekte të këtij programi ku qeveria do të mbështesë kreditimin e tyre për të pasur mundësinë e marrjes së një shtëpie me kushte krejtësisht të tjera nga kushte të tregut bankar dhe në këtë mënyrë ne do i japim motivim e besojmë shumë që ky është një detyrim që shteti ta marrë përsipër në kushtet ku plotësimi i nevojave është një objektiv që do e arrijmë patjetër. Ne do të kombinojmë disa masa dhe patjetër që nuk mund të vazhdojmë para se të formësojmë një politikë të caktuar që të financojmë studimet në mjekësi me një ndarje me kushte të pranueshme kur studentët rrinë në Shqipëri”– tha Rama.
