SPAK shpalli ditën e djeshme zyrtarisht nën hetim Arben Ahmetaj, me ish-zv/kryeministrin që akuzohet për veprat penale “shpërdorim të detyrës”, “fshehje të të ardhurave”, “korrupsion” dhe “pastrim të parave”.
Të gjitha akuzat janë ngritur mbi të në lidhje me implikimin e Ahmetajt në kohën që drejtonte Ministrinë e Financave, në aferën e inceneratorëve.
SPAK ka bashkuar dy procedime ndarjen e fraksionit për inceneratorin e Elbasanit ku po hetohet për shpërdorim detyre dhe korrupsion dhe pastrim parash pas kallëzimit qe i është bërë për vilën në Hamallaj.
Në lidhje me pasuritë, organi i akuzës ka marrë në pyetje shumë persona mes të cilëve edhe ish bashkëshorten, e cila ka deklaruar se ka në pronësi vetëm shtëpinë në ish-Bllok ndërsa vila në Palasë nuk është e saja.
Ndërkohë që hetimi nuk kërkon një mandat autorizimi nga kuvendi i Shqipërisë, në rast se do të procedohet me arrestimin e Ahmetajt, SPAK do të duhet të kërkojë edhe një autorizim nga Kuvendi, për t’i hequr mandatin e deputetit.
Në media përflitet se SPAK pritet t’i dërgojë kërkesë Kuvendit për fletë-arrestin e Arben Ahmetajt gjatë kësaj jave, por një informacion i tillë mbetet i pakonfirmuar.
Por, në rast se ish-zëvendësi i Ramës detyrohet të lërë mandatin e deputetit pas kërkesës së SPAK, kurioziteti shtohet për emrin që do ta zëvendësojë në Kuvend.
Praktikisht, nëse marrim në konsideratë votat preferenciale të kandidatëve për deputetë të Partisë Socialiste në qarkun e Tiranës, mandati i Ahmetajt i takon drejtoreshës së re të Agjencisë Shtetërore të Kadastrës, Dallëndyshe Bici.
Në zgjedhjet e 25 prillit ajo grumbulloi 4977 vota teksa renditej e 22 në listën për kryeqytetin dhe sipas votës preferenciale ka marrë më shumë vota se kandidatët e tjerë në listën jo fituese të PS-së për Tiranën.
Por, nëse Dallëndyshe Bici do të refuzonte të merrte mandatin e deputetit, atëherë mandati do t’i kalonte ish-Sekretarit të Përgjithshëm të Ministrisë së Arsimit, Plarent Ndreca, pasi sipas votës preferenciale ka grumbulluar 4008 vota në qarkun e Tiranës.
