Ish-Kryeministri Sali Berisha denoncoi përmes rrjeteve sociale përmbytjen e banesave në Laprakë, ndonëse kryetari i bashkisë së Tiranës, kishte deklaruar se në Tiranë nuk kishte asnjë problem.
“Në Laprakë pas hapjes së Bovillës përmbyten banesat, Lal Plehu thotë: Kujdes në zonat e thella se në Tiranë falë punës që kemi bërë nuk kemi asnjë problem!”, shkruan Berisha në postimin e tij, duke e shoqëruar edhe me video.
“Ndiqni kronikën e ABC News!
“Përmbyten disa banesa në Laprakë, banorët: Askush nuk u përgjigj
Një lagje në zonën e Laprakës në Tiranë është përmbytur nga reshjet e shiut. Banorët kërkojnë ndihmë pasi disa shtëpi janë akoma nën ujë e disa të tjera janë bërë të pabanueshme.
I vunë pritë, por nuk ia dolën dot të shmangin hyrjen e ujit nga reshjet e rrëmbyeshme të shiut.
Banesat në këtë lagje të njësisë administrative Laprakë në Tiranë janë përmbytur edhe këtë vit.
Niveli i ujit nuk ka qenë ai i përmbytjeve të viteve të mëparshme megjithatë orenditë shtëpiake janë dëmtuar.
Thonë se kanë kërkuar ndihmë por askush nuk iu përgjigj thirrjes së tyre.
Kafshët shtëpiake i kanë ngjitur nëpër tarraca, edhe vetë aty kanë qëndruar gjatë gjithë natës.
Por ka edhe nga ata banorë që e braktisën shtëpinë.
Edhe pse nuk kanë marrë asnjë përgjigje vazhdojnë të shpresojnë se dikush do t’i ndihmojë”.
