Luçiano Boçi, kandidati i opozitës për bashkinë e Elbasanit, denoncon se Bashkia po shpërndan ndihma në këmbim të votës.
Në një postim në rrjetet sociale, ai poston një video ku duket një grumbullim personash. Këta të fundit, shpjegon deputeti demokrat, presin të marrin ndihmat nga një komunitet fetar, që po bashkëpunon me bashkinë e Elbasanit.
Në reagimin që shoqëron pamjet, Boçi shpjegon: Me dhimbje dhe neveri kam përcjellë atë që po ndodh sot në Elbasan. Bashkia Elbasan ka hartuar lista me njerëz që marrin ndihmë ekonomike dhe i ka paisur ata me letra ndihmash në këmbim të firmës së tyre dhe kundrejt zotimit se me 14 maj do të votojnë për PS-në. Për të shmangur shpërndarjen e ndihmave në Bashki, lista shumë emërore i është dhënë përfaqësuesve të një komuniteti fetar dhe pamjet flasin vetë!
Ai u bën apel institucioneve të drejtësisë që të veprojnë.
“Është rasti që institucionet e drejtësisë të veprojnë menjëherë! Faktet janë publike! Pasi i kanë mbajtur peng dhe i kanë zhytur në varfëri për 16 vjet, tani po u blejnë njerëzve edhe dinjitetin”, shkruan Boçi.
