Është shoqëruar në komisariatin e policisë, Aleks Vishaj, i cili postoi pak ditë më parë një video në “TikTok” duke ecur me makinë në një shpejtësi prej 305km/h.
I riu është gjobitur nga policia me 100 mijë lekë të reja. Gjithashtu policia i ka bllokuar mjetin tip “Ferrari” me të cilin udhëtonte.
I riu postoi në rrjetin e tij social një video ku shihej teksa udhëtonte në tunelin e Kalimashit me një shpejtësi më shumë se 300Km/h.
“Pas publikimit në rrjetet sociale, të një videoje në të cilën shfaqej një automjet që qarkullonte me shpejtësi 305 km/h, Policia Rrugore e Tiranës ka intensifikuar punën për identifikimin e automjetit dhe të drejtuesit të tij. Në bazë të pamjeve filmike të siguruara, është identifikuar dhe ndaluar automjeti tip “Lamborghini” me drejtues shtetasin A. V., të cilin e Policia e ka shoqëruar në Komisariat. Ndaj drejtuesit të automjetit u mor masë administrative 100 000 lekë të rinj”, njofton policia.
Policia Rrugore e Tiranës apelon për drejtuesit e automjeteve që të zbatojnë me rigorozitet rregullat e qarkullimit rrugor dhe apelon gjithashtu për ndalimin e publikimeve që kanë karakter joedukativ për sigurinë rrugore.
