Tirana është pretendentja për titullin kampion dhe kjo është e vërteta. Edhe pse bardheblutë kanë ulje-ngritjet e tyre gjatë këtij sezoni, gjërat nuk është se po u shkojnë keq.
Për momentin janë të parët në renditje me dy pikë më shumë se vendi i dytë.
Jo vetëm kaq. Gjithsesi, Tirana përtej çdo problemi është në krye.
Dhe për këtë janë pesë arsye shumë të rëndësishme që duhet të analizohen për të treguar se Tirana jo vetëm që është pretendente për kreun, por përse mund të shpallet kampione e Shqipërisë.
MBROJTJA DHE SULMI – Për ata që nuk e dinë, Tirana është e para jo vetëm me pikë, por ajo kryeson edhe në komponentë të tjerë në Superiore. Kështu, bardheblutë janë të parët me sulmin më të mirë me 37 gola. Po një tjetër armë e fortë e Tiranës është edhe mbrojtja. Në 25 javë Superiore, Tirana ka pësuar 22 gola. Kampionët janë skuadra me më pak gola të pësuar, duke treguar se Najdovski me shokë po e bëjnë mirë punën në prapavijë.
TRAJNERI – Një tjetër armë e fortë e Tiranës është fakti që bardheblutë kanë një trajner special. Bëhet fjalë për Orges Shehin. Ky i fundit është trajneri më jetëgjatë i Tiranës në historinë e viteve 2000. Ai di ta ndryshojë skuadrën edhe në ditë të vështira.
LOJTARËT me eksperiencë – Një tjetër garanci për titullin janë lojtarët me eksperiencë. Aleksi, Najdovski, Toshevski janë kampionë. Po kështu, Hasani, Abazaj, Lushkja e Deliu së bashku me Bekajn në portë i japin jo vetëm qetësi kësaj skuadre. Ata dinë që në ndeshje të caktuara të nxjerrin Tiranën nga problemet.
GABIMET – Ky kampionat ka pasur shumë oshilacione për Tiranën. Fakt është që ka humbur dy derbi edhe është mundur me të mëdhatë. Gjithsesi, Tirana ka dominuar me të voglat. Fakt është që paçka shumë humbjeve me të mëdhatë, Tirana është në krye dhe kjo falë faktit se bardheblutë kanë kundërshtarë shumë më të dobët, që asnjëherë nuk janë ngjitur as në nivelin e tyre.
MERKATO – Një tjetër armë e fortë e Tiranës këtë sezon ka qenë merkatoja. Bardheblutë kanë larguar shumë lojtarë, por ata janë zëvendësuar me të tjerë. Madje shumë cilësorë. Mjafton të kujtojmë që Deliu, Lulaj, Hasani, Patrik apo edhe Aleksi, Lushkja si dhe Kallaku, që u largua, janë emra që djem si Seferin, Xhixhën apo Tolin e Ismajlgecin i kanë zëvendësuar më së miri.
