Të shtëna me armë zjarri janë shënuar në fshatin Ramicë të Selenicës, këtë të Martë. Nga të shtënat nuk raportohet për persona të lënduar.
Sipas një rindërtimi paraprak të ngjarjes nga autoritetet, dy persona kanë kanosur dhe dhunuar një çoban 36-vjeçar për ti marrë parë para. Pasi nuk ia kanë arritur qëllimit, dyshohet se kanë qëlluar me armë zjarri drejt tij.
Një prej autorëve të dyshuar është arrestuar, ndërsa tjetri është shpallur në kërkim. Ata janë Endri Beqiraj dhe Julo Rrokaj, të dy me precedent në fushën e krimeve kundër personit.
I arrestuari është Endri Beqiraj, 33 vjeç, banues në Vlorë, ndërsa në kërkim u shpall Julo Rrokaj, 30 vjeç, banues po në qytetin bregdetar.
Ngjarja
Policia u vu në lëvizje pasi mori lajmërimin se ndaj një personi është qëlluar me armë zjarri, bënë me dije burime zyrtare.
Beqiraj dhe Rrokaj “dyshohet se në bashkëpunim me njëri-tjetrin, kanë kanosur dhe dhunuar shtetasin Gëzim Lekaj,, 36 vjeç, i cili punonte çoban, në fshatin Ramicë, për t’i marrë atij një shumë parash. Të dy këta shtetas, pasi nuk kanë marrë paratë e kërkuara nga 36-vjeçari, dyshohet se kanë qëlluar me armë zjarri, në drejtim të tij. Gëzim Lekaj ka mundur të fshihet dhe t’u shpëtojë të shtënave”, njoftoi policia.
Të njëjtat burime shtuan se vijon puna nën drejtimin e Prokurorisë për zbardhjen e plotë të rrethanave të kësaj ngjarjeje, ndërsa materialet procedurale i kaluan Prokurorisë pranë Gjykatës së Rrethit Gjyqësor Vlorë për veprime të mëtejshme për veprat penale: “Vrasja me dashje”, mbetur në tentativë, kryer në bashkëpunim, “Shtrëngimi me anë të kanosjes ose dhunës për dhënien e pasurisë” dhe “Mbajtja pa leje dhe prodhimi i armëve, armëve shpërthyese dhe municionit”.
Precedenti
Rasti i gjobëvënies nga dy autorët e dyshuar të kësaj ngjarjeje nuk është i pari.
Të dy rezultojnë të arrestuar më herët për një rast të ngjashëm. Në vitin 2017, sipas një njoftimi policor të kohës, ata janë vënë në pranga pasi i kanë vënë një gjobë prej 100.000 eurosh një shtetasi.
Më 13 Gusht, policia do të njoftonte arrestimin e tyre për veprën penale Shtrëngimi me anë të kanosjes ose dhunës për dhënien e pasurisë, kryer në bashkëpunim.
“Specialistët e Seksionit të Krimeve ndaj Personit në Drejtorinë Vendore të Policisë Vlorë, duke përdorur metodat speciale të hetimit si edhe në bazë të informacioneve të siguruara në rrugë operative, më datë 12.08.2017, në fshatin Qishbardhë kanë bërë të mundur kapjen dhe ndalimin e shtetasve: Endri Beqiraj, 28 vjeç, banues në Vlorë. Julo Rrokaj, 25 vjeç, banues në Vlorë. Të dy këta shtetas prej disa muajsh kanë kërcënuar me anë të telefonit, shtetasin Sh.S., 46 vjeç, banues në Vlorë, që t’u jepte një sasi vlerash monetare prej 100.000 Euro. Ditët e fundit këta shtetas e kanë kërcënuar edhe me jetë në rast se nuk do të jepte shumën e kërkuar. Konflikti mes Endrit dhe shtetasit Sh.S, për motive të dobëta”, thuhej në njoftimin e bluve.
