Mospërfaqësimi i dy grupimeve të Partisë Demokratike në zgjedhjet lokale të 14 majit me logon e selisë blu mbetet një pikëpyëtje e madhe e shqetësuese, të cilës pritet që KQZ t’i japë zgjidhje pasditen e nesërme.
Edhe pse KAS riktheu sot në Komisionin Qendror të zgjedhjeve dy ankimimet lidhur me vendimin e parë të kryekomisionerit Ilirjan Celibashi për të rrëzuar kërkesën për regjistrim, grupimi “Alibeaj” dhe kreu i PD, Sali Berisha do të kenë sytë e drejtuar nga ky institucion.
Pavarësisht se përfaqësuesit ligjor të grupit “Alibeaj” pretendojnë se dokumentacioni i tyre është i plotë, duket se Celibashi nuk ka ndërmend të lëshojë pe dhe kërkon me ngul dy firmat e Lulzim Bashës, në autorizimin për Enkelejd Alibeajn, Indrit Sefën dhe Gazmend Bardhin, por edhe deklaratën solemne të kryetarit të partisë.
Këtë la të kuptohej në një intervistë të dhënë sot në mbrëmje në emisionin “Log”, kreu i KQZ, i cili u shpreh se ligji e përcakton qartë se cilat dokumente duhen dorëzuar duke mos e përjashtuar faktin se PD rrezikon të mbetet jashtë regjistrimit në zgjedhje.
“Ne mundet në çdo rast të bëjmë në mënyrë figurative cirk dhe të japim intepretimin që dëshirojmë ne. Nëse ligji thotë duhet të depozitohet ky dokument, do të thotë që ai dokument duhet të depozitohet. Nëse dispozita thotë dokumenti X duhet të paraqitet, atëherë nuk ka rrugë-zgjidhje tjetër”, u shpreh ai.
Ai u pyet se cilit i takon faji në rast se PD mbetet jashtë zgjedhjeve dhe u përgjigj duke thënë: “Faji i kujt është nuk kam pikën e interesit”.
I pyetur më konkretisht, nëse do t’i qëndrojë vendimit të parë që dha për të dy PD-të, Celibashi nënvizoi: “Di të them që plotësimi i dokumentacionit do duhet të bëhet në përputhje me vendimin. Do mbetet për t’u parë nesër për orën 16:00. Afati 48 orë ishte për PD-në, jo për KQZ-në. Nesër do e them vendimin”.
Sakaq, kreu i KQZ komentoi vendimin e KAS për ankimimin që bënë dy palët e PD-së përsa i përket regjistrimit për zgjedhjet vendore, duke e konsideruar qëndrim të drejtë.
“KAS në vlerësimin tim mori vendimin që duhet pasi vendimi i KQZ-së për t’i dhënë 48 orë kohë për plotësimin e dokumentacionit, nuk ishte një vendim i themelit. Ishte një vendim procedurial që i jepte një afat më të gjatë për të plotësuar dokumentacionin. Mbi këtë fakt, duke mos qenë një vendim përfundimtar, KAS vendosi që të mos marrë në shqyrtim.
Kërkohet që të respektohet ligji rigorozisht në pikëpamje të numrit të dokumenteve, llojet të dokumenteve. Ato janë parashikime të ligjit, është ligjvënësi për t’i vendosur këto rregulla. Përë KQZ detyrimi është për t’i respektuar si janë shkruar. Se çfarë pasoje juridike apo politike sjell ligji, kjo s’është përgjegjësi e KQZ-së. Për dikë mund të konsiderohet pa sens, por në fund të fundit, ata që kanë bërë ligjin, kjo ka sens”, deklaroi ai.
