Një atentat ndodhi ditën e djeshme në një lokal në “Don Boskos”, ku humbi jetën 60-vjeçarja Mimoza Paja, u plagosën 5 persona të tjerë, si dhe u dëmtua nga ciflat e xhamave një e mitur 10-vjeçare.
Lidhur me ngjarjen e rëndë ka reaguar kryetari i PL-së, Ilir Meta, i cili në Fb shkruan se kriminelët lëvizin lirshëm në rrugët e Tiranës dhe rrezikojnë çdo ditë jetën e qytetarëve.
“Pa kaluar dy javë nga vrasja makabër e tre grave të pafajshme krimi godet sërish, kësaj radhe duke rrezikuar në mënyrë ekstreme jetën e njerëzve të pafajshëm në lagjen e Don Boskos. Kriminelët lëvizin lirshëm në rrugët e Tiranës dhe rrezikojnë çdo ditë jetën e qytetarëve.
Kjo situatë e rendit dhe sigurisë publike, që përkeqësohet çdo ditë dhe çdo orë tregon qartë se qeverisja e rilindjes ka dështuar totalisht dhe e ka futur vendin në kaos“, shkruan Meta.
Meta thekson se qeveria nuk ka bërë asgjë për ndalimin e kriminalitetit dhe rritjen e sigurisë për qytetarët.
“Qeveria nuk ka bërë asgjë për ndalimin e kriminalitetit, rritjen e sigurisë dhe parandalimin e veprave kriminale ndaj të cilave po ekspozohen të pambrojtur qytetarët shqiptarë.
Qytetet tona meritojne dhe kërkojne siguri, që qeveria e inkriminuar rilindase j’ua ka mohuar për shkak të kapjes së saj nga krimi.
Ndaj të ngrihemi të gjithë në këmbë për të realizuar Ndryshimin, që mbron qytetarët dhe familjet e tyre nga krimi”, shkruan Meta.
