Kreu i Partisë Demokratike, Sali Berisha ka zbuluar se si do të veprohet me çështjen e “vulës” në Partinë Demokratike.
Pas vendimit të Apelit të cilin e konsideroi si të “blerë” nga dyshja Rama-Kim, Berisha theksoi se PD do e apelojë vendimin në gjykatat ndërkombëtare.
Gjatë intervistës në emisionin “Opinion”, kreu i demokratëve theksoi se në gjykatat ndërkombëtare kjo çështje do të shkojë pasi të ketë ezauruar të gjitha shkallët e gjyqësorit në vendin tonë.
Pyetje: Keni thënë që do ta apeloni këtë vendim në të gjitha shkallët në Shqipëri, por edhe në gjykatat e tjera europiane…
“Apelimi ka 2 kuptime: Kuptimi i parë është sepse pavarësisht se këto janë institucione të kontrolluara tërësisht nga partia, këtu nuk ka një alternativë tjetër dhe ne nuk kemi një parti për një rend parashtetëror dhe kuptimi i dytë është se ne kemi besim të plotë në Gjykatën Ndërkombëtare, e cila ka një rregull që ankimimi atje të ketë kaluar shkallët e gjyqësorit, por e preferuar është kjo. Nuk mund të pranojë kurrë gjykata e Stasburgut një proces gjyqësor ku palë shpallet ajo që nuk ka qenë palë. Ky standard Rama-Yuri Kim në Shqipëri, nuk ekziston askund në botë përveç se në Korenë e Veriut. Mund të ekzistojë në Bjellorusinë e Lukashenkos apo në ndonjë vend tjetër diktatorial. Shqipëria ka të drejtën e plotë që t’i drejtohet Gjykatës Ndërkombëtare”, u shpreh Sali Berisha.
Më herët, Sali Berisha u shpreh se kryeministri Edi Rama dhe ambasadorja amerikane Yuri Kim kanë ndërhyrë “brutalisht” në gjyqin për çështjen e vulës së PD-së.
