Kryetari i PD-së, Sali Berisha u shpreh këtë të Hënë se kryeministri Edi Rama dhe ambasadorja amerikane Yuri Kim kanë ndërhyrë “brutalisht” në gjyqin për çështjen e vulës së PD-së.
Në një intervistë televizive për emisionin “Opinion”, duke komentuar vendimin e Apelit që ktheu çështjen për rishqyrtim në gjykatën e faktit, Berisha tha se “gjykatësit lexuan një shkresë që u dërgoi Rama me Elira Kokonen”.
Ai tha se përveç Ramës, ndërhyrje brutale në gjykatë ka bërë dhe ambasadorja Yuri Kim “përmes Veliajt e Blerina Muçit”.
“Gjykatësit lexuan një shkresë vendimi që ju dërgoi Rama me Elira Kokonën. Këtë unë e kam denoncuar para se të mblidhet gjykata. Kam denoncuar ndërhyrjen brutale të Edi Ramës me Elira Kokonën, si kundër kisha denoncuar më parë ndërhyrjen brutale të Yuri Kim nëpërmjet Erion Veliajt tek Blerina Muçi dhe akuzat ishin të faktuara, tha Berisha.
“Unë ndikimin, ndërhyrjen brutale të Yuri Kim tek Blerina Muçi e kam denoncuar ditën që ka ndodhur dhe ajo nuk e ka mohuar. Ajo është detyruar që ta pohojë sepse e ka kuptuar se Erion Veliaj kishte treguar për takimin që kishte pasur me të. Atë ditë në gjykim nëse e vutë re ishin nga mëngjesi deri në darkë, në paradhomë dhe në prapadhomë edhe përfaqësuesit e ambasadës amerikane në një formë presioni. Më shumë garancie se presioni se vendimi ishte marrë. Ky vendim u njoftua publikisht një javë përpara në Parlament nga Taulant Balla. Ky vendim iu tha një ambasadori me presidentin e të cilit Rama ka një miqësi vëllazërore nga Olta Xhaçka se gjykatësit do t’i japin vulën Enkelejd Alibeajt. Këto të ishin të gjitha të paralajmëruara, këto i kanë publikuar mediat. Nuk i kanë kundërshtuar ata që janë cituar nga këto akte”, shtoi ai.
“Qëllimi i Edi Ramës dhe Yuri Kim ka qenë që PD të mos marrë pjesë në zgjedhje. Yuri Kim ka parashikuar që ose bëhet kjo ose shkatërrohet PD-ja, por nuk u bë. PD-ja është forca kryesore politike opozitare. Mcgonigal mori atë që meriton, Mcgonigalët e tjerë do marrin ndëshkimin që meritojnë. Edi Rama është sot një armik real i SHBA me aktin që ka kryer. Është një kufomë e pakalluar që do të marë ndëshkimin e vet, kurse PD-ja është një forcë politike pro-perëndimore që mbron vlerat të cilat ndan me shoqëritë e këtyre vendeve”, theksoi Berisha.
Kryeopozitari u shpreh se përmes apelimit të çështjes së vulës synohet të shkohet në gjykata ndërkombëtare. “Kemi besim te gjykatat ndërkombëtare”, tha ai.
Për “dosjen ruse” ku i akuzuar ishte Basha, Berisha tha se mbyllja e saj u bë nga Rama dhe me këtë akt, sipas tij, kreu i qeverisë e mori peng ish-kryetarin e PD.
Ai tha nuk mund të negociohet me Bashën dhe Alibeajn, pasi sipas tij, ata janë vegla në duart e Ramës.
“Basha dha Alibasha janë të larguar nga PD në mënyrë përfundimtare”, tha ai.
“Apeli për qytetarët është të vazhdojmë me guxim këtë betejë kundër Ramës. Fitorja është e sigurt. Rama i ka kohërat e numëruara. Është një kufomë politike që kundërmon kudo ku shkon”, deklaroi Berisha.
