Një person raportohet i zhdukur, një tjetër i plagosur dhe dyshime për tjetër viktimë, pasi një ndërtesë gjashtëkatëshe është shembur në qytetin turk Şanlıurfa si pasojë e dëmtimeve nga tërmetet e fuqishme të shkurtit.
Pallati që shihni si rrënojë, në foto, ndodhej në lagjen Haliliye dhe është shembur plotësisht sot.
Por drama nuk mbaron këtu. Autoritetet thonë se nën rrënoja është e mundur të ketë ngelur një person, ndërsa një person tjetër është dërguar në spital me plagë të ndryshme.
Dëshmitarët thanë se ndonëse godina ishte vlerësuar si e pabanueshme, ata shkonin herë pas here për të marrë gjërat e tyre.
Një prej tyre tregoi se vetëm 15 minuta para shembjes, ishte futur të merrte diçka në katin e pestë ku kishte apartamentin.
