Një person është arrestuar dhe tre të tjerë janë proceduar në gjendje të lirë në kuadër të operacionit policor të koduar “Pakot postare” këtë të shtunë.
Blutë bënë me dije se administratori i një poste private, 43-vjeçari A.Sh u vu në pranga pasi gjatë kontrollit të magazinave të postës në Linzë, Policia gjeti në cilësinë e provës materiale, 260 pako dhe 46 thasë me mallra të ndryshme pa fatura tatimore shoqëruese apo deklarata doganore për origjinën e mallrave.
Në vijim të kontrolleve u gjetën edhe disa pako me logon e një poste tjetër, të papajisura me fatura apo deklarata doganore.
Nga veprimet hetimore dyshohet se mallrat e sekuestruara janë futur kontrabandë në Shqipëri.
Ndërkaq, të proceduar janë shtetasit D. P., 27 vjeç, E. M., 46 vjeç, dhe M. S., 18 vjeç. Në kërkim është shpallur shtetasja A. Gj., 38 vjeçe, administratore e një poste tjetër private.
