Pas vrasjes së 3 grave nga Dan Hutra në Tiranë, “dhuna në familje” është kthyer në një problem shqetësues në vendin tonë.
Ditën e sotme është arrestuar një 44-vjeçar nga Bulqiza i cili ushtronte vazhdimisht dhunë psikologjike dhe fizike ndaj ish-gruas së tij.
Në pranga ka rënë shtetasi me iniciale F.D, i cili ka thyer urdhrin e mbrojtjes dhe në mënyrë të përsëritur ka ushtruar dhunë ndaj saj. Ai rezulton i dënuar edhe më parë për dhunë në familje.
“Kreu veprime në kundërshtim me vendimin e gjykatës, ushtroi dhunë psikologjike dhe fizike ndaj ish-bashkëshortes së tij, vihet në pranga 44-vjeçari. Nga specialistët për Hetimin e Krimit në Komisariatin e Policisë Bulqizë, u bë arrestimi në flagrancë i shtetasit F.D., 44 vjeç, banues në Bulqizë( i dënuar më parë për Dhunë në familje). Ky shtetas ka thyer urdhërin e mbrojtjes që kishte ish-bashkëshortja e tij dhe në mënyrë të përsëritur ka ushtruar dhunë psikologjike dhe fizike ndaj saj”, njofton policia.
Materialet procedurale i kaluan Prokurorisë pranë Gjykatës së Shkallës së Parë Dibër, për veprime të mëtejshme.
