Ish-kryebashkiaku i Lushnjës Fatos Tushe u rikthye sot në qeli, pasi policia vendosi në zbatim një vendim të gjykatës së Apelit të Posaçëm të GJKKO, që i shtoi dënimin.
Ditën e djeshme, Apeli ka fajësuar Tushen edhe për “shkelje të barazisë në tendera”, vepër për të cilën mori pafajësi në shkallën e parë. Si rezultat, Tushe u dënua me 3 vjet e 4 muaj burg, nga 2.4 që ishte dënuar me shkallën e parë.
Ndërkohë policia bën me dije se ish-kryebashkiaku do të vuajë dënimin në burgun e Fierit.
“Sot më datë 02.03.2023, specialistët për Hetimin e Krimeve të Komisariatit të Policisë Lushnjë kanë ekzekutuar vendimin e datës 01.03.2023, të dhënë nga Gjykata e Posaçme e Apelit për Korrupsionin dhe Krimin e Organizuar Tiranë, e cila ka vendosur se shtetasi Fatos Tushe, 55 vjeç (ish-kryetar i bashkisë Lushnjë) duhet të kthehet në IEVP, për të vuajtur 1 vit burgim, për veprën penale “Shkelja e barazisë së pjesëmarrësve në tendera apo ankande publike”, kryer në bashkëpunim. Shtetasi F. T. do i dorëzohet IEVP Fier, me qëllim vuajtjen e dënimit”, njoftojnë uniformat blu.
