Transporti publik në Tiranë është kthyer në një shqetësim serioz për banorët e kryeqytetit. Të gjitha linjat e autobusëve janë në kaos pasi nuk respektojnë orarin, tej mbushen, pësojnë defekte në mes të rrugës madje së fundmi po përfshihen edhe në aksidente të frikshme.
Pas aksidentit të djeshëm në zonën e “Shallvares”, ditën e sotme një qytetar ka publikuar në media një video denoncuese. Qytetari pretendon se udhëtarët e autobusit të linjës Kamëz-Tiranë kanë zbritur te Zogun e Zi për shkak të një defekti në mjet.
Qytetari shkruan se mëngjesin e sotëm kanë dëgjuar një zhurmë të forte në autobus, kurse shoferi ka ndaluar pranë Zogut të Zi dhe ka zbritur të gjithë pasagjerët.
Denoncimi nga qytetari:
“Linja Kamez – Tirane ka shkatuar panik tek udhetaret sot. Per shkak te nje zhurme te forte mjeti ka ndaluar prane zogut te zi”, shkruan qytetari.
Vetëm një ditë më parë, një urban i linjës ‘Unaza’ u përplas me të paktën 10 automjete duke lënë të plagosur dhjetëra persona. Ngjarja ndodhi pranë zonës së njohur si ‘Shallvaret’. Në pranga është vënë shoferi i kësaj linje urbani në pronësi të në pronësi të Nadir Çaushollit që shpesh është bërë lajm i kronikave dhe aksidenteve të ndryshme.
Rreth një vit më parë, një tjetër autobus i kompanisë në pronësi të Nadir Çaushollit, përfundoi në lumin Lanë, së bashku me pasagjerët në bord. Tashmë kjo çdo linjë autobusësh është kthyer në një rrezik të madh për qytetarët në Tiranë.
